जळगाव प्रतिनिधी | बनावट चावीच्या साह्याने निर्मनुष्य ठिकाणाहून दुचाकी चोरणाऱ्या दोन अट्टल चोरट्यांना शनिवारी स्थानिक गुन्हे शाखेच्या पथकाने अटक केली. या चोरट्यांकडून ५ लाख १५ हजार रुपये किमतीच्या १९ दुचाकी हस्तगत करण्यात आल्या आहेत. चोरीच्या दुचाकी गहाण ठेवून ते लोकांकडून पैसे घेत होते.
आरिफ शरीफ तडवी (वय २४, रा. गणेशनगर, पहूर) व चेतन संजय चव्हाण (वय २३, रा. लोहारा, ता. पाचोरा) असे अटक केलेल्या चोरट्यांनी नावे आहेत. मागील वर्षभरापासून ग्रामीण भागात शेताच्या बांधावरून दुचाकी चोरीच्या घटनांमध्ये वाढ झाली होती. शेताचे बांध, निर्मनुष्य ठिकाणावरून या दुचाकी चोरीस जात होत्या. एकसारख्या पद्धतीने दुचाकी चोरींची संख्या वाढल्यामुळे पोलिसांनी या घटनांचा अभ्यास केला. यात पहूर येथील आरिफ तडवी हा तरुण सातत्याने दुचाकी गहाण ठेवत असल्याची माहिती स्थानिक गुन्हे शाखेचे निरीक्षक किरणकुमार बकाले यांना मिळाली.
काही दिवस आरिफवर नजर ठेवल्यानंतर त्याच्याकडे चोरीच्या दुचाकी असल्याची ठोस माहिती समोर आली. त्यानुसार पथकाने आरिफ तडवी याला ताब्यात घेतले. पोलिसी खाक्या दाखवताच त्याने गुन्ह्याची कबुली दिली. तसेच चेतन चव्हाण याच्या मदतीने चोऱ्या केल्याचेही पोलिसांना सांगितले. आरिफ व चेतन यांची गावे जवळ-जवळ आहेत. त्यामुळे दोघांमध्ये ओळख झाली होती. या ओळखीतून दोघांनी दुचाकी चोरीचा घाट घातला. वर्षभरात दोघांची १९ दुचाकी चोरून गहाण ठेवल्या होत्या. मिळालेल्या पैशांतून मौजमजा करत होते. त्यांनी विविध पाेलिस ठाण्यांच्या हद्दीतून चाेरी केली अाहे.
