भुसावळ प्रतिनिधी | तालुक्यातील खंडाळा येथील महिलेने गळफास घेऊन आत्महत्या केल्यावर तिच्या अनुक्रमे ३ व ९ वर्षीय मुलांना देखील विषबाधा झाल्याचे समाेर आले होते. त्यापैकी नऊ वर्षाच्या मुलाचा उपचार सुरू असतांना मृत्यू झाला आहे. श्रेयस (वय ९) असे या मृत बालकाचे नाव आहे.
याबाबत असे की, खंडाळा येथे २५ ऑगस्ट रोजी अश्विनी चाैधरी या विवाहितेने गळफास घेऊन आत्महत्या केली होती. त्यानंतर तिच्या प्रणव (वय ३) आणि श्रेयस (वय ९) या दाेघां मुलांना विषबाधा झाल्याचे निष्पन्न झाले होते. आईने आत्महत्यापूर्वी दोघा मुलांना विष दिल्याचं बोललं जात होत.
प्रणव आणि श्रेयस या दोघांना डॉ.उल्हास पाटील वैद्यकीय महाविद्यालयात नेण्यात आले. तेथे उपचाराअंती प्रणवच्या प्रकृतीत सुधारणा झाल्याने बुधवारी रात्री सुटी झाली. मात्र, श्रेयसच्या शरीरात जास्त प्रमाणात विष भिनल्याने उपचार सुरू होते. येथे त्याच्या प्रकृतीत दोन दिवसानंतर काहीसी सुधारणा झाली होती.
मात्र, त्याची प्रकृती अचानक खालावली. यामुळे सोमवारी त्याला जळगावहून नाशिक येथील खासगी दवाखान्यात हलवण्यात आले. तेथे त्याने शेवटचा श्वास घेतला. यानंतर सोमवारी रात्रीच मृतदेह गावी खंडाळा येथे आणून अंत्यविधी करण्यात आले.
