काबूल,(वृत्तसंस्था)- अफगाणिस्तानातील काबूल शहरात सलग दोन बॉम्बस्फोटच्या घटना घडल्याने शहर हादरलं आहे. अफगाणिस्तानची राजधानी काबूलमध्ये असलेल्या हमीद करझई आंतरराष्ट्रीय विमानतळाच्या गेटवर हे दोन स्फोट झाले असून या हल्ल्यात आतापर्यंत १० पेक्षा जास्त जणांचा मृत्यू झाल्याची माहिती समोर आली आहे. तसेच अनेक नागरीक यामध्ये जखमी झाल्याची माहिती तालिबानकडून देण्यात आली आहे. या हल्ल्याची जबाबदारी आयसीस या दहशतवादी संघटनेने स्वीकारली आहे.
गेल्या काही दिवसांपासून अफगाणिस्तानवर तालिबानने ताबा मिळवला असून तेव्हा पासून अफगाणिस्तानात वातावरण चांगलेच चिघळले आहे. अफगाणिस्तानातील अमेरिकेच्या दुतावासातून बॉम्ब स्फोट होण्याबाबत अलर्ट जारी करण्यात आला होता. तसेच फ्रान्स दुतावासातून देखील अलर्ट जारी करण्यात आला होता. तरी देखील अखेर ज्याची भीती होती ती घटना आज घडली असून काबूल आंतरराष्ट्रीय विमानतळाच्या गेटवर काही तासांच्या अंतरावर दोन बॉम्बस्फोट झाल्याने शहर हादरले आहे.
