नवी दिल्ली – प्रेमासाठी अनेक जण वाटेल ते करतात. अनेकदा प्रेम प्रकरणात अपयश आल्यास टोकाचा निर्णय घेतला जातो. अशीच एक घटना आता समोर आली आहे.
प्रेमात धोका मिळाल्याने भाजपाच्या युवा नेत्याने टोकाचं पाऊल उचललं आणि आत्महत्या करून जीवन संपवलं आहे. गोपाळ सिंह राजपूत असे आत्महत्या केलेल्या भाजपाच्या युवा नेत्याचे नाव आहे. ते छत्तीसगडमधील दुर्ग शहरातील आहे. दरम्यान, घटनास्थळी पोलिसांना एक सुसाईड नोट देखील सापडली. ज्यामध्ये प्रेमात धोका मिळाल्याचं म्हटलं आहे.
पोलिसांनी दिलेल्या माहितीनुसार, गोपाळने सर्वात आधी हाताची नस कापली आणि नंतर गळफास घेऊन आत्महत्या केली. आत्महत्या करण्यापूर्वी गोपाळने आपल्या कुटुंबीयांसोबत रात्री एकत्र जेवण घेतलं. त्यांच्याशी गप्पा मारल्या. त्यानंतर रात्री तो आपल्या खोलीत झोपायला निघून गेला.
सकाळी बराच वेळ तो दार उघडत नसल्यामुळे त्याच्या भावाने दरवाजा तोडला. त्यावेळी गोपाळने गळफास घेतला होता. गळफास घेण्यापूर्वी त्याने स्वतःच्या हाताची नसदेखील कापली होती. हे पाहून कुटुंबीयांना मोठा धक्काच बसला. गोपाळच्या पाकिटात त्याने लिहिलेली सुसाईड नोट पोलिसांना सापडली. आपल्याला प्रेमात आलेलं अपयश सहन होत नसल्यामुळेच आपण आत्महत्या कऱण्याचा निर्णय घेत आहोत असं त्याने या नोटमध्ये लिहिलं आहे. पोलीस याप्रकरणाचा अधिक तपास करत आहेत. एका हिंदी वेबसाईटने याबाबतचे वृत्त दिले आहे.
