जळगाव : महावितरण कंपनीच्या परिमंडळ कार्यालय कंपाऊंडमधील ऑफिसर्स कॉटर्समध्ये एका इमारतीत तयार केेलेल्या विलगीकरण कक्षातून गाद्या, पलंग, पंखे, उशी व ट्यूबलाइट असे साहित्य चोरीस गेले. याप्रकरणी दाखल गुन्ह्यात पोलिसांनी शनिवारी 3 चोरट्यांना अटक केली. या चोरट्यांनी रिक्षातून सामान वाहून नेल्याची माहिती समोर आली आहे.
संतोष उर्फ बाळू नामदेव सैंदाणे (वय 45, रा. सद्गुरूनगर), दत्तू नामदेव चौधरी (वय 37, रा. जैनाबाद) व सुरेश उर्फ सागर प्रमोद सोनवणे (वय 35, रा. इंदिरानगर, खेडी) असे अटक केलेल्या तिघांची नावे आहेत. ऑफिसर्स कॉटर्सच्या विलगीकरण कक्ष तयार करण्यात आला होता. कोरोनाचा प्रादुर्भाव कमी झाल्यानंतर हा कक्ष बंद करण्यात आला. त्यानंतर चार प्रशिक्षणार्थी महिला यात राहत होत्या. त्यांचे प्रशिक्षण पूर्ण झाल्यानंतर 27 जुलैपासून पुन्हा एकदा कक्ष बंद करण्यात आला.
यानंतर चोरट्यांनी कक्षाचे कुलूप तोडून त्यातील चार गाद्या, चार पलंग, सहा पंखे व दोन ट्यूबलाइट असे 65145 रुपयांचे साहित्य चोरून नेले. याप्रकरणी एमआयडीसी पोलिसात गुन्हा दाखल आहे. त्यांनी चोरी केलेले साहित्य घरातच ठेवलेले होते. हे सर्व साहित्य पोलिसांनी हस्तगत केले आहे. तिघांना रविवारी कोर्टात हजर करण्यात येणार आहे.
यांनी केली कारवाई
पोलिस निरीक्षक प्रताप शिकारे, सहायक फौजदार आनंदसिंग पाटील, गणेश शिरसाळे, मिलिंद सोनवणे, योगेश बारी, इम्तियाज खान यांच्या पथकाने कारवाई केली.
