यावल प्रतिनिधी । तालुक्यातील दहीगाव येथील व्यापारी कालीदास विलास सुर्यवंशी (वय-३३) यांना गॅसची डिलरशीप देण्याचे आमिष दाखवून १० लाख ३० हजाराची ऑनलाईन फसवणूक करणाऱ्या दोघांच्या सायबर पोलिसांनी मुसक्या आवळल्या आहे. सुनिल कुमार सहानी (वय-३८, रा. बिहार) व कन्हैय्या कुमार सहानी (वय-४३, कलकत्ता) असे संशयित आरोपींचे नाव आहे.
यावल तालुक्यातील दहीगाव येथील रहिवाशी कालीदास सुर्यवंशी यांना १८ डिसेंबर २०२० ते ३० डिसेंबर २०२० दरम्यान एका अनोळखी नंबरवरून फोन येवून आशितोष कुमार असे बनावट नाव सांगून उज्जवला गॅस एजन्सीची डिलरशिप देते असे सांगून बनावट कागदपत्रे खरे भासविले. तसेच उज्जवला गॅस एजन्सी नावाचे बनावट ऑनलाईन पोर्टल बनविले होते. त्यांनी वेगवेगळे कारणे सांगून कालीदास सुर्यवंशी यांच्या खात्यातून एकुण १० लाख ३३ हजार रूपये लंपास गेल्याचे समोर आले होते.
याप्रकरणी कालीदास सुर्यवंशी यांच्या फिर्यादीवरून सायबर पोलीस ठाण्यात अज्ञात व्यक्तीविरोधात गुन्हा दाखल करण्यात आला होता. या गुन्ह्याचा शोध लावून सायबर पोलीस ठाण्यात पोलीस निरीक्षक बळीराम हिरे यांच्या पथकाने संशयित आरोपी सुनिल सहानी, कन्हैय्या कुमार सहानी यांना अटक केली आहे. पुढील कारवाई करण्यात येत आहे.
