जळगाव प्रतिनिधी । विविध ठिकाणाहून दुचाकी लांबविणाऱ्या तिघांच्या आज शुक्रवारी स्थानिक गुन्हे शाखेने मुसक्या आवळल्या आहे. शुभम राजेंद्र परदेशी (वय २१) दीपक सुनील खरे (वय २२) शुभम शांताराम माळी (वय २१) तिन्ही रा.शहापुर ता.पाचोरा अशी संशयितांची नावे आहेत. त्यांच्याकडून चोरीच्या ७ दुचाकी हस्तगत करण्यात आल्या आहेत.
याबाबत सविस्तर असे कि, पाचोरा तालुक्यातील शहापूर येथील महाविद्यालयीन तरुण दुचाकी चोरी करत असल्याची माहिती स्थानिक गुन्हे शाखेच्या पथकाला मिळाली. पथकाने माहिती काढून शुभम परदेशी व दीपक खरे व शुभम माळी या तीन जणांना आज अटक केली. त्यांनी जळगाव शहरातील रामानंदनगर, पाचोरा शहर तसेच सोयगाव ता.अौरंगाबाद येथून दुचाकी चोरल्याची कबुली दिली असून त्यांच्याकडून चोरीच्या ७ दुचाकी हस्तगत करण्यात आल्या आहेत.
दरम्यान तिघे संशयित हे मित्र असून सोयगाव येथे फोटोशूट करण्यासाठी गेले असताना या ठिकाणी त्यांना काही दुचाकी पसंत पडल्याने त्या दुचाकीही संशयितांनी चोरल्याचे तपासात समोर आले आहे.
