मुंबई : जागतिक बाजारातील कच्च्या तेलाच्या महागाईचा भार ग्राहकांना लादून तोटा कमी करण्याचा प्रयत्न पेट्रलियम कंपन्यांनी सुरु केला आहे. आज सलग तिसऱ्या दिवशी कंपन्यांनी पेट्रोल आणि डिझेल दरात वाढ केली. यामुळे महागाईचा भडका उडण्याची शक्यता आहे. आज देशभरात पेट्रोल ३० पैसे आणि डिझेल ३५ पैशांनी महागले. कंपन्यांनी केलेल्या दरवाढीने मागील १२ दिवसांत डिझेल ३.१५ रुपयांनी महागले आहे. तर पेट्रोलमध्ये १० दिवसांत झालेल्या दरवाढीने २.०५ रुपयांची वाढ झाली आहे.
आज जळगावात पेट्रोल प्रति लिटर ११०.१६ रुपये इतके आहे तर डिझेल ९८.८१ इतके आहे. तर सलग तीन दिवस झालेल्या दरवाढीने आज मुंबईत एक लीटर पेट्रोलचा भाव १०९.२५ रुपयांपर्यंत वाढला. दिल्लीत पेट्रोल १०३.२४ रुपये झाले आहे. चेन्नईत पेट्रोलचा भाव १००.७५ रुपये इतका वाढला आहे. कोलकात्यात एक लीटर पेट्रोल १०३.९४ रुपये झाला आहे. भोपाळमध्ये साध्या पेट्रोलचा भाव १११.७६ रुपयांपर्यंत वाढला आहे. बंगळुरात पेट्रोल १०६.८३ रुपये झाले आहे.
आज मुंबईत एक लीटर डिझेलचा भाव ९९.५५ रुपये झाला आहे. दिल्लीत डिझेल ९१.७७ रुपये आहे. चेन्नईत ९६.२६ रुपये आणि कोलकात्यात डिझेलचा भाव ९४.८८ रुपये प्रती लीटर इतका आहे. भोपाळमध्ये डिझेलचा भाव १००.८० रुपये असून बंगळुरात डिझेल ९७.४० रुपये आहे.
जागतिक कमॉडिटी बाजारात ब्रेंट क्रूडचा भाव मागील काही दिवस तेजीत आहे. बुधवारी अमेरिकेत ब्रेंट क्रूडचा भाव ०.८ डाॅलरने कमी होऊन ८१.०८ डाॅलर झाला. डब्ल्यूटीआय क्रूडचा भाव १.३० डाॅलरने घसरला आणि तो ७७.४३ डाॅलर प्रती बॅरल झाला.
