मुंबई : शिवसेना नेते खासदार संजय राऊत यांची अलिबाग आणि मुंबईमधील संपत्ती इडीकडून जप्त करण्यात आली आहे. ईडीने कारवाई केल्यानंतर आज पुन्हा एकदा संजय राऊत यांनी पत्रकार परिषद घेत भाजप आणि किरीट सोमय्या यांच्यावर जोरदार निशाणा साधला आहे.
किरीट सोमय्या यांनी संजय राऊतांच्या आरोपांवर उत्तर देताना आयएनएस विक्रांत घोटाळ्याबाबत पुरावे सादर करण्याची मागणी केली. त्याला प्रत्युत्तर देताना राऊत यांनी राजभवनाच्या पत्रापेक्षा आणखी मोठा पुरावा कोणता असू शकतो, असा सवाल केला. सोमय्या ही महाराष्ट्राला लागलेली कीड असून ही कीड संपवणार असल्याचेही राऊतांनी म्हटले.
संजय राऊत यांनी यावेळी ईडीवर देखील निशाणा साधला आहे. केंद्रीय तपास यंत्रणा जर खरच निपक्षपाती असतील तर त्यांनी या प्रकरणाचा तपास करावा असे आवाहान राऊत यांनी केले आहे. विक्रांतच्या संवर्धनासाठी कोट्यावधी रुपये जमा करण्यात आले, मात्र ते राजभवनापर्यंत पोहोचलेच नाहीत तर मग हे पैसे गेले कुठे असा सवाल राऊतांनी उपस्थित केला आहे.
‘कश्मीर फाइल्स’ चित्रपट पाहून झाला असेल तर आता पंतप्रधान नरेंद्र मोदी, गृहमंत्री अमित शाह यांच्यासह भाजप नेत्यांनी आता ‘आयएनएस विक्रांत फाइल्स’ पाहावी असा टोला शिवसेना नेते खासदार संजय राऊत यांनी दिले. सोमय्या यांनी जमा केलेला निधी हडपला आहे. हा देशद्रोह असल्याचे राऊत यांनी म्हटले.
