मुंबई- काँग्रेसच्या कार्यक्रमात वाटप करण्यात आलेल्या पुस्तकातून सावरकरांची बदनामी करण्यात आली आहे. तुमच्या महाराष्ट्र धर्माच्या पालनात सावरकर येत असतील तर या पुस्तकावर महाराष्ट्रात तातडीने बंदी घालण्यात यावी, अशी मागणी भाजपने मुख्यमंत्री उद्धव ठाकरे यांच्याकडे केली आहे.सावरकर यांचे नातू रणजीत सावरकर यांनीही या पुस्तकावर बंदी घालण्याची मागणी केली आहे.
मध्य प्रदेशातील भोपाळमध्ये झालेल्या काँग्रेस सेवा दलाच्या कार्यक्रमात सावरकरांच्या संदर्भातील पुस्तक वाटप करण्यात आलं होतं. या पुस्तकात सावरकरांची बदनामी करणारा आक्षेपहार्य मजकूर छापण्यात आलेला आहे. या पुस्तकाची माहिती मिळताच त्यावरून भाजपने काँग्रेसवर हल्ला चढवला होता. सावरकरांची बदनामी करण्याची काँग्रेसची खोडच असल्याची टीका भाजपकडून करण्यात आली होती. रणजीत सावरकर यांनीही या पुस्तकावर तीव्र आक्षेप घेत पुस्तकावर बंदी घालण्याची मागणी मुख्यमंत्री उद्धव ठाकरे यांच्याकडे केली आहे.
भादंवि कलम १२०, ५००, ५०३, ५०४, ५०५ आणि ५०६ अन्वये संबंधितांवर गुन्हा दाखल करण्याची मागणी रणजीत सावरकर यांनी केली आहे. महाराष्ट्राचे मुख्यमंत्री उद्धव ठाकरे यांनी सुद्धा या प्रकरणाची गंभीर दखल घेऊन कारवाई करण्याचं आवाहनही त्यांनी केलं आहे. मध्य प्रदेशात काँग्रेसकडून सातत्याने अशी पुस्तके वाटली जात आहेत. त्याला शिवसेनेने आक्षेप घ्यायला हवा, असं ते म्हणाले.
