जळगाव : गारपीट आणि अवकाळी पावसाने हैराण होऊन बसलेल्या शेतकऱ्यांना काहीसा दिलासा देणारी बातमी आहे. ती म्हणजे कापसाच्या किमतीत वाढ झाली असून प्रतिक्विंटर सुमारे आठ हजारांपर्यंत पोचले आहेत. कापसाच्या दरात वाढ झाल्याचं कळताच अनेक शेतकऱ्यांनी सुटकेचा श्वास घेतला आहे.
यंदा कापसाला अपेक्षेप्रमाणे भाव मिळत नसल्याने अनेक शेतकऱ्यांनी कापूस घरातच ठेवला आहे.अनेक महिने वाट पाहूनही कापसाला भाव मिळत नव्हता, त्यामुळे शेतकऱ्याची चिंता आणखी वाढली होती.
उत्पादन खर्च वाढूनही कापसाचा भाव ८ हजारांच्या पुढे जात नसल्यामुळे शेतकरी मेटाकुटीस आला होता. मात्र आता कापसाच्या भावात वाढ झाली आहे. जळगाव जिल्ह्यात सध्या कापसाला प्रतिक्विंटल जवळपास 8300 ते 8500 रुपयापर्यंतचा (हा दर अंदाजित आहेत) दर मिळत आहे. त्यामुळे भाववाढीच्या प्रतीक्षेत असलेल्या कापूस उत्पादक शेतकऱ्यांना थोडासा दिलासा मिळाला आहे.
कापसाचे दर पुन्हा वाढतील. त्यामुळे शेतकऱ्यांनी घाबरु नये, असे आवाहन कापूस बाजारातील अभ्यासकांनी केले आहेत. सध्या बाजारात अफवा असली तरी कापसाचे भाव पडणार नाहीत. शेतकऱ्यांनी विक्री मर्यादीत ठेवल्यास कापसाचे दरही टिकून राहतील, असंही जाणकारांनी म्हटलं आहे.
यंदा शेतकऱ्यांनी कापूस रोखून धरला त्यामुळं कापसाचे भाव टिकून आहेत, असं कॉटन असोसिएशन ऑफ इंडिया अर्थात सीएआयचे अध्यक्ष अतुल गणात्रा यांनी एका मुलाखतीत म्हटलं होतं. त्यामुळं शेतकऱ्यांनी ८ हजार ५०० रुपयांपेक्षा कमी दरात कापूस विकू नये. तसंच एप्रिल महिन्याच्या अखेरीपर्यंत कापसाची सरासरी दरपातळी ८ हजार ५०० ते ९ हजार ५०० रुपयांच्या दरम्यान राहू शकते.
