मुंबई/बोदवड,(सचिन पाटील)- अवघ्या काही महिन्यांपूर्वी मुक्ताईनगरातील ६ नगरसेवकांचा शिवसेनेत प्रवेश करून शिवसेनेने माजी मंत्री खडसेना जबरदस्त झटका दिला होता. त्यातच आज दि.२४ सप्टेंबर २०२१ शुक्रवारी रोजी पुन्हा दुसऱ्यांदा शिवसेनेने माजी मंत्री खडसेंवर धक्का दिला असून बोदवड नगरपंचायतच्या नगराध्यक्षा श्रीमती मुमताज बी सईद बागवान यांच्यासह 10 नगरसेवकांचा शिवसेनेत प्रवेश करून घेतला आहे हा प्रवेश सोहळा शिवसैनिकांची पंढरी समजल्या जाणाऱ्या मातोश्री येथे मुख्यमंत्री तथा शिवसेना पक्षप्रमुख उद्धवजी बाळासाहेब ठाकरे यांच्या हस्ते पार पडला.
यावेळी राज्याचे नगरविकास मंत्री ना.एकनाथजी शिंदे , राज्याचे पाणीपुरवठा व स्वच्छता मंत्री तथा पालकमंत्री,जळगांव ना.गुलाबरावजी पाटील, शिवसेना जिल्हाप्रमुख तथा आमदार चंद्रकांतजी पाटील तसेच शिवसेना तालुका प्रमुख छोटू भोई , विधानसभा क्षेत्रप्रमुख सुनील पाटील ,गटनेता तथा शहरप्रमुख राजेंद्र हिवराळे, नगरसेवक पियुष मोरे ,मुकेश वानखेडे, आरिफ आझाद , दीपक संतोष माळी, अफसर खान , जमील बागवान, मोहसीन बागवान, रितेश सोनार आदींची उपस्थिती होती.
अवघ्या काही महिन्यांपूर्वी मुक्ताईनगर नगरपंचायतीत खडसेंनी स्थापन केलेल्या निर्विवाद सत्तेला सुरुंग लावत शिवसेनेने भाजप गटनेत्यांसह तब्बल ६ नगरसेवकांना शिवसेनेत प्रवेश दिला होता.हा प्रवेश मुख्यमंत्री उद्धव ठाकरे यांनीच दिला होता.यानंतर खडसेंची बरीच आगपाखड झाल्याचे दिसून आले व ओळख परेड करीत त्यांनी नगरसेवक त्यांच्या ताब्यात असल्याचा दावा केला होता.यानंतर भाजप पक्ष आघाडीत काही बदल करून शिवसेनेत प्रवेश केलेल्या गटनेत्याच्या जागेवर निलेश प्रभाकर शिरसाठ यांची निवड माजी मंत्री खडसेंनी केली होती. या घडामोडिंना अवघे काही दिवस उलटत नाही तोच शिवसेनेने भाजपचा दुसरा गटनेता देखील आता गळाला लावला असून बोदवड नगरपंचायत प्रवेशासह गटनेता निलेश प्रभाकर शिरसाठ यांनी देखील शिवसेनेत जाहीर प्रवेश केला आहे त्यांना देखील मुख्यमंत्री उद्धवजी ठाकरे यांनी शिवबंधन बांधले.
