मुंबई : दक्षिण आफ्रिकेत आढळून आलेल्या ओमीक्रॉनच्या भीतीने देशभरात अलर्ट जाहीर करण्यात आला आहे. करोनाचे प्रमाण कमी झाल्याने अनेक राज्यात पूर्ण क्षमतेने शाळा सुरु होणार होत्या. पण आता ओमीक्रॉनचा धोका पाहता शाळा सुरु होणार का? असा प्रश्न निर्माण झाला होता. परंतु शाळा ठरल्या दिवशीच १ डिसेंबरपासून सुरू होणार, असल्याची माहिती राज्याचे आरोग्यमंत्री राजेश टोपे यांनी दिलीय. महाराष्ट्राला अद्याप ओमिक्रॉन व्हेरिएंटचा धोका नाही, मात्र सावधगिरी बाळगण्याची आवश्यकता आहे, असेही राजेश टोपे यांनी स्पष्ट केले.
महाराष्ट्राला अद्याप नव्या ओमिक्रॉन व्हेरिएंट प्रसाराचा धोका नसल्याचे आरोग्यमंत्री राजेश टोपे यांनी सोमवारी प्रसारमाध्यमांसमोर स्पष्ट केले. तसेच शाळा सुरू होण्यासही काही हरकत नसल्याने शाळा ठरल्या वेळेनुसार सुरू होणार असल्याचे त्यांनी सांगितले. त्यामुळे राज्यातील पहिलीपासूनचे वर्ग सुरू होण्याबाबतचा संभ्रम तूर्त तरी दूर झाला आहे.
शाळांसाठीची नियमावली
१. शाळेचा सर्व परिसर निर्जंतुक केलेला असावा.
२. विद्यार्थ्यांना शाळेत बोलावण्यापूर्वी स्वच्छतेच्या सर्व सुविधा उपलब्ध कराव्यात.
३. शाळेतील सर्व कर्मचाऱ्यांनी लशीचे दोन्ही डोस तातडीने पूर्ण करावेत.
४. विद्यार्थ्यांना सॅनिटायझर, फेस मास्क याचा पुरवठा करावा.
५. शाळेत येताना किंवा शाळा सुटल्यानंतर विद्यार्थी गर्दी करणार नाहीत, याची शाळांनी काळजी घ्यावी.
विद्यार्थी आणि पालकांसाठी सूचना
१. विद्यार्थ्यांनी शाळेत इतर विद्यार्थ्यांसोबत एकत्र येऊ नये.
२. पालकांनी विद्यार्थ्यांना वाहनांमधून शाळेत पाठवताना वाहनांचे निर्जंतुकीकरण केले आहे की नाही, हे तपासून पाहावे.
३. विद्यार्थ्यांनी सामूहिक खेळ खेळू नयेत.
४. शाळेत एकत्र येऊन डबा खाण्यास, जेवण्यास सक्त मनाई
