मुंबई – लंडनमधील ‘लंडन आय’च्या धर्तीवर मुंबईतही मुंबई आय उभारण्यात येणार आहे. राज्य मंत्रिमंडळाची बैठक संपल्यानंतर उपमुख्यमंत्री अजित पवार यांनी ही माहिती दिली.
मुंबईतील वांद्रे-वरळी सी लिंकजवळ हे ‘मुंबई आय’ साकारण्यात येणार आहे. वांद्रे येथे सी लिंक सुरू होताना टोल नाक्याजवळ असलेल्या जागेवर ‘मुंबई आय’ साकारण्यात येणार आहे. सीआरझेड व इतर परवानग्यांबाबत अडचण निर्माण न झाल्यास याच ठिकाणी ‘मुंबई आय’ साकारण्यात येणार असल्याची माहिती उपमुख्यमंत्री अजित पवार यांनी दिली. ‘मुंबई आय’ साकारण्यात आल्यास पर्यटकांचा ओढा मुंबईकडे वाढणार आहे. या ‘मुंबई आय’मधून संपूर्ण मुंबईचे विहंगमय दृष्य पाहण्याची संधी पर्यटक आणि मुंबईकरांना उपलब्ध होणार आहे.
याआधीदेखील चार वर्षांपूर्वी मुंबई महानगरपालिकेचा वांद्रे बॅण्ड स्टॅण्डजवळील १४ हजार स्केअर मीटर जागेवर मुंबई आय उभारण्याचा प्रस्ताव होता. महापालिकेच्या प्रस्तावानुसार या मुंबई आयची उंची ६३० मीटर इतकी असणार होती. हा जगभरातील सर्वात उंच पाळणा ठरला असता. मात्र, पुरेशा निधीअभावी हा प्रस्ताव बास्तनात गुंडाळला गेला.
लंडन आय’ हा मोठ्या आकाराच्या आकाश पाळण्यासारखा आहे. थेम्स नदीच्या काठावर ‘लंडन आय’ उभारण्यात आले असून जगभरातील पर्यटकांमध्ये याचे आर्कषण आहे. ‘लंडन आय’ची उंची ही १३५ मीटर असून ३१ डिसेंबर १९९९ रोजी पर्यटकांसाठी खुले करण्यात आले होते. दरवर्षी ‘लंडन आय’ला जवळपास ३५ लाख पर्यटक भेट देतात.
