नवी दिल्ली – केंद्र सरकारने फ्रान्स खरेदी केलेल्या ३६ राफेल लढाऊ विमानांच्या खरेदी प्रकरणी दाखल करण्यात आलेल्या फेरविचार याचिका सुप्रीम कोर्टाने फेटाळून लावल्या आहेत. त्यावर काँग्रेस नेते राहुल गांधी यांनी प्रतिक्रिया व्यक्त केली आहे. कोर्टाच्या निर्णयामुळे राफेल घोटाळ्याच्या चौकशीचे दरवाजे उघडले असून आता याप्रकरणी गंभीरपणे चौकशी व्हायला हवी, अशी मागणी राहुल गांधी यांनी केली आहे.
राफेलप्रकरणी सर्वोच्च न्यायालयाने दिलेल्या निर्णयावर राहुल गांधी यांनी ट्विट करून ही मागणी केली आहे. यावेळी त्यांनी राफेल घोटाळ्याच्या चौकशीसाठी संयुक्त संसदीय समिती स्थापन करण्याची मागणीही केली आहे. यापूर्वीही राहुल यांनी राफेल घोटाळ्याची चौकशी करण्यासाठी संसदीय समिती स्थापन करण्याची मागणी केली होती. या घोटाळ्यावरून त्यांनी केंद्र सरकारला घेरण्याचा वारंवार प्रयत्नही केला होता. त्यासाठी त्यांनी चौकीदार चोर हैच्या घोषणाही दिल्या होत्या. सर्वोच्च न्यायालयानेही चौकीदार चोर है, हे मान्य केल्याचं वक्तव्यही त्यांनी केलं होतं.
कोर्टात आज काय घडले?
सुप्रीम कोर्टाचे सरन्यायाधीश रंजन गोगोई यांच्या अध्यक्षतेखालील तीन न्यायाधीशांच्या खंडपीठाने राफेलवरील याचिकांवर सुनावणी केली. या सुनावणीत खंडपीठाने राफेल विमान खरेदी वैध ठरवत याचिका फेटाळून लावल्या. यासोबतच राफेल व्यवहाराची सीबीआयद्वारे चौकशी करण्याच्या मागणीही कोर्टाने फेटाळली.
राफेल विमान खरेदी व्यवहार वैध असल्याचा निकाल सुप्रीम कोर्टाने १४ डिसेंबर २०१८ला दिला होता. राफेल विमान खरेदीतील निर्णय प्रक्रिया स्पष्ट आहे. त्यात संशयाला कुठलाही वाव नाहीए, असं सुप्रीम कोर्टाने म्हटलं होतं. परंतु या निकालावर फेरविचार करणाऱ्या काही याचिका सुप्रीम कोर्टात दाखल करण्यात आल्या होत्या. दाखल केलेल्या सर्व फेरविचार याचिका सुप्रीम कोर्टाने यावेळी सुनावणीत फेटाळून लावल्या. भारताने फ्रान्सकडून ३६ राफेल लढाऊ विमानांची खरेदी केलीय. हा विमान खरेदी व्यवहार ५८ हजार कोटी रुपयांचा आहे.
