जळगाव, दि.6:- आगामी सणासुदीचा व गर्दीचा हंगाम लक्षात घेता प्रवाशांकडून मोठया प्रमाणात खाजगी कंत्राटी बसेसचा वापर करण्यात येत असल्याने प्रवाशांकडून खाजगी कंत्राटी वाहतूकीची ने-आण करणाऱ्या वाहतूकदारांकडून गर्दीच्या हंगामामध्ये अवाजवी भाडेवाढ करण्यात येते. अशा खाजगी कंत्राटी वाहनांच्या भाडेदरासंदर्भात मा. उच्च न्यायालय, मंबई येथे जनहित याचिका क्र. 149/2011 दाखल करण्यात आली होती. सदर याचिकेत मा. उच्च न्यायालयाने खाजगी कंत्राटी वाहनांचे भाडेदर निश्चित करण्याचे आदेश शासनास दिले होते.
उच्च न्यायालयाच्या निर्देशानुसार महाराष्ट्र शासनाकडून खाजगी कंत्राटी प्रवासी वाहनांचे भाडे निश्चित करण्यासंदर्भात Central Institute Of Road Transport, pune या केंद्र शासनाच्या संस्थेची नियुक्ती करण्यात आली होती. सदर संस्थेकडून वाहतूकीच्या विविध वर्गवारीतील सोयीसुविधा इत्यादि बाबींचा अभ्यास करुन भाडेदर निश्चित करण्यात आलेले आहेत.
राज्यातील खाजगी कंत्राटी प्रवाशी वाहनांचे कमाल भाडेदर महाराष्ट्र राज्य परिवहन महामंडळाच्या वाहनांचे संपूर्ण बससाठी प्रति किलोमीटर भाडेदर त्याच स्वरुपाच्या महाराष्ट्र राज्य मार्ग परिवहन महामंडळाच्या संपूर्ण बससाठी येणाऱ्या प्रती किलोमीटर भाडेदराच्या 50% पेक्षा अधिक राहणार नाही असे कमाल भाडेदर महाराष्ट्र शासन गृह विभाग यांचे शासन निर्णय क्र. एमव्हीआर-0412/प्र.क्र.378/(पु.बा.07) परि.2 दि. 27 एप्रिल,2018 अन्व्ये निश्चित करण्यात आलेले आहे.
खाजगी वाहतूकदारांनी स्पर्धात्मक वातावरणात वाजवी भाडे आकारुन प्रवाशांना वाहतूक सुविधा उपलब्ध करुन देणे आवश्यक आहे. गर्दीच्या हंगामात मागणी पुरवठा यामधील तफावतीमुळे मोठया प्रमाणात भाडेवाढ करुन प्रवाशांची आर्थिक पिळवणूक होवू नये या उद्देशाने कमाल भाडे निश्चित करण्यात आलेले आहे. निश्चित भाडेदरापेक्षा अधिक भाडे आकारल्याचे निदर्शनात आल्यास संबंधित परवानाधारक वाहनतूकदाराविरुध्द मोटार वाहन कायद्यातील तरतूदीनुसार कडक कारवाई करण्यात येईल. खाजगी ट्रॅव्हल्स भाडेदरावर नियंत्रण आणण्याकरीता वेळोवेळी विशेष तपासणी मोहिम राबविली जाते. या अंतर्गत वायुवेग पथकातील मोटार वाहन निरीक्षक हे खाजगी ट्रॅव्हल्स मालकांना प्रत्यक्ष भेटून उपरोक्त शासन निर्णयानुसार भाडे आकाराणीबाबत सूचना देतात.
जळगाव शहरातून खाजगी बसेस या पुणे, मुंबई, नागपूर, सुरत अहमदाबाद या ठिकाणी ये-जा करीत असतात. या कार्यालयाव्दारे खाजगी ट्रॅव्हल्स मालकांना प्रवशांकडून किती भाडे आकारावे याबाबतचा तक्ता तयार करुन प्रवशांच्या सोयीकरीता प्रत्येक खाजगी ट्रॅव्हल्स कंपनी यांचे कार्यालयात फलक माहिती लावणेबाबतच्या सूचना देण्यात आलेल्या आहेत. प्रवाश्यांचा माहितीकरिता सदर तक्त्यात नमुद असलेल्या भाडेदरास एकुण आसनाक्षमतेने भागीतले असता प्रती आसन प्रती प्रवाशी असा भाडेदर निश्चीत करता येईल.
तरी कोणत्याही खाजगी वाहतूकदाराकडून ( खाजगी ट्रॅव्हल्स ) कंपनीकडून महाराष्ट्र शासन गृह विभाग यांचे शासन निर्णय क्र. एमव्हीआर -0412/प्र.क्र.378/ (पु.बां.07)/परि.2 दि. 27 एप्रिल,2018 अन्वये निश्चित केलेल्या भाडेदरापेक्षा जादाभाडे आकारणी केल्याबाबत तक्रार mvdcomplaint.enf२@gmail.com या संकेतस्थळावर करावी तसेच अशा तक्रारी प्राप्त झाल्यास संबंधित वाहतूकदारावर मोटार वाहन कायदा 1988 अन्वये कारवाई करण्यात येईल याची सर्व संबंधित नागरिक व खाजगी ट्रॅव्हल्स वाहतूकदार यांनी नोंद घ्यावी, असे उप प्रादेशिक परिवहन अधिकारी श्याम लोही यांनी एका प्रसिध्दी पत्रकान्वये कळविले आहे.
