मुंबई – केंद्र सरकारमध्ये लवकरच ‘आयसीआयसीआय’ बँकेचे अध्यक्ष के. व्ही कामथ यांच्यावर मोठी जबाबदारी सोपवली जाण्याची शक्यता आहे. पंतप्रधान नरेंद्र मोदी यांच्याकडून कामथ यांच्यावर अर्थराज्यमंत्री पदाची जबाबदारी दिली जाईल, अशी शक्यता आहे. त्याशिवाय माजी मंत्री सुरेश प्रभू देखील कमबॅक करण्याची शक्यता आहे.
के. व्ही कामथ हे ब्रिक्स बँकेचे विद्यमान अध्यक्ष आहेत. त्यांना अर्थराज्यमंत्री पद देण्याची शक्यता आहे. कामथ यांचं कॉर्पोरट क्षेत्रात आदराचे स्थान आहे. ते इन्फोसिसशी देखील संबंधित आहेत. त्याशिवाय भाजपचे राज्यसभा खासदार स्वपन दासगुप्ता यांचाही मंत्रीमंडळात समावेश केला जाईल, असे सूत्रांनी म्हटले आहे. कामथ यांचा कॉर्पोरटमधील अनुभव आणि वित्तीय सेवा क्षेत्रातला अभ्यास भारताला भविष्यात आर्थिक धोरणे ठरवताना फायदेशीर ठरेल, असे सूत्रांनी म्हटलं आहे. भाजपप्रणीत राष्ट्रीय लोकशाही आघाडी सरकारने विविध क्षेत्रातील तज्ज्ञांचा प्रशासनात प्रभावी वापर करण्याचा निर्णय घेतला आहे. त्यानुसार कामथ , स्वपन दासगुप्ता, निती आयोगाचे मुख्य कार्यकारी अधिकारी अमिताभ कांत यांना कार्यकाळ पूर्ण झाल्यानंतर केंद्रीय मंत्रिमंडळ परिषदेत जबाबदारी दिली जाऊ शकते. स्वपन दासगुप्ता हे खासदार आहेत.
