पुणे : पुणे महापालिका कार्यालयात भाजप नेते किरीट सोमय्या यांना धक्का बुक्की करण्याचा प्रकार घडला. या प्रकारानंतर आज सोमय्या यांच्यासह भाजपच्या शिष्टमंडळाने आज दिल्लीत केंद्रीय गृहसचिवांची भेट घेतली. दरम्यान भाजपचे प्रदेशाध्यक्ष चंद्रकांत पाटील यांनीही आज थेट केंद्रीय गृहमंत्री अमित शहा यांना पत्र लिहले आहे. “मॉब लिचिंग करुन किरीट सोमय्या यांची हत्या करायचा कट होता. याप्रकरणी आता केंद्राने जातीने लक्ष घालून कारवाई करावी, अशी मागणीही चंद्रकांत पाटील यांनी पत्रातून केली आहे.
भाजप प्रदेशाध्यक्ष चंद्रकांत पाटील यांनी केंद्रीयमंत्री अमित शहा यांना पाठविल्याल्या पत्रात म्हंटले आहे की, भ्रष्टाचाराविरोधात वेगवेगळे घोटाळे बाहेर काढण्याचे काम किरीट सोमय्या करीत आहेत. त्यांच्यावर झालेल्या हल्ल्याप्रकरणी आता NIA चौकशी करण्यात यावी. तसेच हल्ल्याप्रकरणातील दोषींवर कारवाई केली जावी. सोमय्या यांच्यावर झालेल्या जीवघेण्या हल्ल्यानंतर पोलिसांनी कमकुवत कलमी लावली आहेत. तसेच त्यांच्याकडून जाणीवपूर्वक हल्लेखोरांना वाचवण्यासाठी प्रयत्न केला जात आहे.
वास्तविक पाहता सोमय्या यांच्यावरकरण्यात आलेल्या हल्ल्याप्रकरणी पोलिसही सामील असल्यामुळे अशा पोलिसांवर कारवाई करावी. तसेच सोमय्यांवरील हल्ल्याचा कट रचणाऱ्या महाराष्ट्र सरकारवरही कारवाई केली जावी, अशीही मागणी चंद्रकांत पाटील यांनी पत्राद्वारे केली आहे
