मुंबई : राज्यात कोविड स्थिती सुधारत असल्याने निर्बंध मोठ्या प्रमाणात शिथील करण्यात येत आहेत. उपाहारगृहे, दुकाने यांच्या वेळा वाढविण्यास हिरवा कंदील दाखवतानाच अम्युझमेंट पार्क सुरू करण्यासही मुख्यमंत्री उद्धव ठाकरे यांनी आज परवानगी दिली. अम्युझमेंट पार्कदेखील 22 ऑक्टोबर पासून सुरू होतील. आज टास्क फोर्सच्या बैठक वर्षा येथे पार पडली. या वेळी लहान मुलांच्या टास्क फोर्सचे सदस्यदेखील उपस्थित होते.
कोविड व्यतिरिक्त डेंग्यू, चिकनगुनिया यांच्या रुग्णांमध्ये मोठ्या प्रमाणावर वाढ होत असून त्यांच्या उपचारांकडे देखील पुरेसे लक्ष द्यावे अशी सूचनाही मुख्यमंत्र्यांनी आजच्या बैठकीत केली. यावेळी बोलताना मुख्यमंत्री पुढे म्हणाले की, आपण हळूहळू निर्बंध शिथील करीत असून रुग्णसंख्या कमी होताना दिसत आहे. २२ ऑक्टोबरपासून आपण चित्रपटगृहे, नाट्यगृहेही सुरू करीत आहोत. उपाहारगृहे व दुकाने यांच्या वेळा वाढवून देण्याची सातत्याने मागणी होत आहे. त्यामुळे त्यांच्या वेळा वाढविण्यासंदर्भात मार्गदर्शक सूचना तयार करण्याचे निर्देश दिले आहेत.
मुलांच्या लसीकरणासंदर्भात केंद्राच्या संपर्कात राहून लस उपलब्ध करून घेणे तसेच याबाबतीत निर्णय झाल्यावर लसीकरणाची तयारी ठेवण्याचे नियोजन करण्याच्या सूचनाही त्यांनी सार्वजनिक आरोग्य विभागास केल्या. करोनाची दुसरी लाट ओसरली असली तरी तिसऱ्या लाटेचा धोका अद्याप कायम असून नियमित मास्क घालणे, सुरक्षित अंतर पाळणे व हात स्वच्छ धूत राहणे खूप आवश्यक आहे, असे सांगून मुख्यमंत्री म्हणाले की, याबाबतीत लोकांनी बेसावध राहू नये म्हणून मोठ्या प्रमाणावर जनजागृती करण्यात यावी. करोनावरील उपचारांसाठी जगात नवनवीन प्रयोग होत असून येणाऱ्या नवीन औषधांच्या बाबतीतही त्यांची परिणामकारकता, किंमत, उपलब्धता याबाबत आतापासूनच माहिती घेत राहावी व संबंधितांच्या संपर्कात राहावे, असेही मुख्यमंत्र्यांनी सांगितले.
