पोटच्या मुलीनं रेकॉर्डिंग ऐकली… आणि आईनेचं बापाची हत्या केल्याचे बिंग उघड केल्याची धक्कादायक माहिती समोर आली आहे. यात मृत पावलेले श्याम रामटेके हे निवृत्त वनकर्मचारी होते.सदर घटना महाराष्ट्र राज्यातील चंद्रपूर शहरातील असून सदर प्रकरणी महिला आणि तिच्या प्रियकराला पोलिसांनी अटक केली आहे.
हृदयविकाराच्या धक्क्याने मृत्यू झाल्याचा केला बनाव
प्राप्त माहिती नुसार चंद्रपूर शहरातील आंबेडकर चौकात आरोपी रंजना रामटेके हिचं दुकान आहे. तर मुकेश त्रिवेदी याचं तिथेच बांगड्यांचं दुकान आहे. आरोपी रंजना हिने ६ ऑगस्ट २०२२ रोजी नागपूरला असलेल्या मुलींना तुमच्या वडिलांचं हृदयविकाराच्या धक्क्याने मृत्यू झाल्याचं सांगितलं होतं. दरम्यान वडिलांच्या मृत्यूच्या काही महिन्यांपूर्वी मुलीने आपल्या आईला एक मोबाईल घेऊन दिला होता. तो मोबाईल छोट्या मुलीने तपासला. तेव्हा तिला त्यात फोन रेकॉर्डींग आढळून आले. त्यातून वडिलांच्या हत्येचे धक्कादायक सत्य समोर आल्याने खळबळ उडाली.
प्रियकर आणि महिलेचा संवाद…आणि मुलींची पोलिसात धाव…
आरोपी रंजना रामटेके व प्रियकर मुकेश त्रिवेदी यांच्यात रेकॉर्डींगनुसार ६ ऑगस्ट रोजी २०२२ पहाटे २.१४ मिनिटांनी आरोपी रंजना १० मिनिटे मुकेश त्रिवेदीसोबत बोलत होती. त्यानंतर मुलीने रेकॉर्डींग स्वतःच्या मोबाईलवर शेअर केली. त्यात वडिलांचे हात बांधून विष पाजून आणि उशीने तोंड दाबल्याचा उल्लेख होता. त्यावर घरातील सर्व साहित्य निट करून सकाळी हृदयविकाराने पतीचा मृत्यू झाल्याचं सांग, असं त्रिवेदी बोलताना आढळून आला असल्याने मोठ्या बहिणीने याबाबत पोलिसांनी कळवलं. पोलिसांनी आरोपी रंजना आणि आरोपी त्रिवेदीला अटक केली असून पुढील तपास सुरू आहे.
