मुख्यमंत्री एकनाथ शिंदे येत्या ८ जानेवारीला राजापूर दौरा करणार आहेत. या दौऱ्यात रत्नागिरी-सिंधुदुर्ग मतदारसंघांचा आढावा घेतला जाणार आहे. शिवसंकल्प अभियानाचे रत्नागिरी-सिंधुदुर्ग मतदारसंघात आयोजन करण्यात आले आहे. या अभियानाच्या माध्यमातून मुख्यमंत्री शिंदे यांची राजापूर येथे जाहीर सभादेखील होणार आहे.
दरम्यान, रत्नागिरी लोकसभा मतदारसंघातून राज्याचे उद्योग मंत्री उदय सामंत यांचे मोठे बंधू किरण सामंत यांच्या नावाची जोरदार चर्चा होताना पाहायला मिळत आहे. शिवसंकल्प अभियानाद्वारे राजापूर येथील जाहीर सभेत शिंदे येथील कार्यकर्ते, पदाधिकारी तसेच प्रमुख नेत्यांना काय आदेश देणार? हे पाहणं महत्त्वाचं असणार आहे.
तसेच, भाजपने सुध्दा कोकणातील लोकसभा मतदारसंघांकडे मोर्चा वळविला असून मंत्री रविंद्र चव्हाण यांनादेखील भाजपकडून तयारी करण्याचे आदेश देण्यात आले आहेत. विशेष बाब म्हणजे भाजपदेखील याच जागेकरिता उमेदवार देण्यास उत्सुक असल्याचे पाहायला मिळत आहे.
