मुंबईः – नागरिकत्व सुधारणा कायदा आणि राष्ट्रीय लोकसंख्या नोंदणी विरोधात मुंबईतील मुंबई सेट्रल येथीलभागात महिलांनी आंदोलन सुरू केले असून, महिलांच्या आंदोलनाचा आज दुसरा दिवस आहे.
सीएए आणि एनआरसी रद्द करावे, या मागणीसाठी रविवार रात्रीपासून महिला ठिय्या आंदोलन करीत असून, महिलांना पाठिंबा देण्यासाठी पुरुषही रस्त्यावर उतरले आहेत. सीएए आणि एनआरसी रद्द होत नाही, तोपर्यंत ठिय्या आंदोलन सुरूच राहणार असल्याचा निर्धार आंदोलनातील महिलांनी बोलून दाखवला.
दिल्लीतील शाहीन बाग परिसरात सीएए आणि एनआरसी विरोधात महिला आंदोलन करीत आहेत. त्यापासून प्रेरणा घेत, शाहीन बागच्या धर्तीवर महिलांनी सीएए आणि एनआरसी विरोधात मुंबईतील नागपाडा परिसरात आंदोलन सुरू केले. आंदोलनाची तीव्रता पाहून कडेकोट बंदोबस्त या परिसरात ठेवला आहे.
दरम्यान, दिल्लीतील शाहीन बाग परिसरात नागरिकत्व सुधारणा कायदा आणि एआरसी विरोधात गेले महिनाभर आंदोलन सुरू आहे. विशेष म्हणजे या आंदोलनात महिला मोठ्या प्रमाणावर सहभागी झाल्या आहेत. कोणताही नेता नसलेले हे आंदोलन दिल्लीसह देशभरात चर्चेचा विषय बनले आहे. आपला संसार सांभाळत या महिला सरकारविरोधी आंदोलन करीत आहेत.
दुसरीकडे, नागरिकत्व सुधारणा कायद्याअंतर्गत भगवान बालाजी वेंकटेश्वरला नागरिकत्व देण्याची मागणी हैदराबाद येथील चिलकूर बालाजी मंदिराचे मुख्य पुजारी रंगराजन यांनी केली आहे. तर, ज्येष्ठ अभिनेते नसीरुद्दीन शहा, चित्रपट निर्मात्या मीरा नायर, गायक टीएम कृष्णा, लेखक अमिताव घोष, इतिहासकार रोमिला थापर यांच्यासह ३०० मान्यवरांनी नागरिकत्व दुरुस्ती कायदा (सीएए) आणि राष्ट्रीय नागरिकत्व नोंदणी (एनआरसी) यांना विरोध दर्शवला आहे.
