सोलापूर : सिव्हिल रुग्णालयात काही कर्मचारी व डॉक्टरांच्या निष्काळजीपणामुळे माणुसकीला काळिमा फासणारी घटना घडली असून टीबी आजाराने ग्रस्त असणाऱ्या २० वर्षीय युवकाचा उपचारादरम्यान मृत्यू झाला. मृताच्या शरीराला मुंग्या लागल्याचा आरोप नातेवाइकांनी केला. या प्रकरणाची चौकशी करण्यासाठी तीन सदस्यीय समिती तैनात केली आहे. दोषी आढळणाऱ्यांवर योग्य ती कारवाई केली जाणार आहे, अशी माहिती वैद्यकीय अधीक्षक डॉ.रोहन खैराटकर यांनी दिली.
बुधवार पेठ येथील राकेश मोरे टीबी आजारावर उपचार घेण्यासाठी दाखल होता. त्याला नाकाद्वारे फीडिंग केले जात होते. मात्र, शनिवारी दुपारी साडेतीनच्या दरम्यान राकेश मृत झाल्याची माहिती संबंधित डॉक्टरांनी नातेवाईकांना दिली होती. मात्र मृत्यू झाल्यानंतर तो मृतदेह लवकर ताब्यात घेतला नाही, अडीच तासांहून अधिक मृतदेह तसाच पडून होता. त्यामुळे मृतदेहाला मुंग्या लागल्या होत्या. ही गोष्ट मृतदेह ताब्यात घेण्यासाठी गेल्यानंतर उघडकीस आली.
