जळगाव :- महसूल कर्मचाऱ्यांच्या प्रलंबित मागण्यांबाबत आठ दिवस होवूनही त्याबाबत शासनाकडून अद्यापपावेतो कोणताही सकारात्मक निर्णय घेण्यात आलेला नाही. दि. 07/04/2022 रोजी मा. अवर सचिव महसूल विभाग यांचेकडे मागण्यांसंदर्भात झालेल्या बैठकीत शासनाकडून कोणत्याळी स्वरुपाची सकारात्मकता दाखविली गेलेली नसल्याने महसूल कर्मचारी संघटनेच्या वतीने मागण्या मान्य होईपावेतो संप सुरुच ठेवणार आहे. सद्यस्थितीला आंदोलन शिस्तबध्दरित्या व सनदशीर मार्गाने सुरु आहे तसेच या पुढे सुरु राहणार आहे.
तथापी मागण्या पूर्ण होण्याच्या दृष्टीने हा सर्वात महत्वाचा व अंतिम टप्पा असल्याने या बेमुदत संपात जिल्ह्यातील सर्व पंधरा तालुके, सात उपविभाग व जिल्हाधिकारी कार्यालय यांमधील सर्व महसूल कर्मचारी सहभागी झालेले आहेत. आंदोलनाच्या अनुषंगाने जिल्हाधिकारी कार्यालयासमोर निदर्शने करुन, घोषणा देण्यात आल्या.
तसेच जिल्हाधिकारी कार्यालयासमोर आंदोलनस्थळी जामनेर, भुसावळ, बोदवड, मुक्ताईनगर येथील सर्व अधिकारी व कर्मचारी उपस्थित होते.
विशेष बाब आज रोजी मा. आमदार श्री. सुरेश (राजुमामा) भोळे, जळगाव शहर यांनी महसूल कर्मचारी संघटनेच्या जिल्हाधिकारी कार्यालयासमोरील आंदोलनस्थळी भेट दिली. मा. आमदार महोदय यांनी महसूल कर्मचारी संघटनेच्या सर्व मागण्या पुर्ण होणेबाबत शासनाकडे पाठपुरावा करणार असल्याचे सांगितले व आंदोलनास आपले समर्थन असल्याचे जाहिर केले.
तसेच या प्रसंगी राज्य महसूल कर्मचारी संघटनेचे सर्व जिल्हा, उपविभाग व तालुका स्तरीय सर्व पदाधिकारी व महसूल कर्मचारी मोठ्या संख्येने उपस्थित होते.
