जळगावः मुंबईत शिवसेना भवनासमोर मनसेने केलेल्या बॅनरबाजीला शिवसेना नेते गुलाबराव पाटील यांनी प्रत्त्युत्तर दिलं आहे. मनसेने शिवसेनेला हिंदुत्व शिकवू नये, राजकारणात किंमत नसल्यानेच आता त्यांनी हिंदुत्वाचा नवा नारा दिला आहे, असा टोलाही पाटील यांनी लगावला.
जळगावात जिल्हा शासकीय वैद्यकीय महाविद्यालय व रुग्णालयाला राज्य सरकारकडून प्राप्त झालेल्या १२ रुग्णवाहिकांच्या लोकार्पण कार्यक्रमानंतर मंत्री पाटील यांनी पत्रकारांशी संवाद साधला. ते म्हणाले की, मनसेने स्थापनेवेळी सर्वधर्म समभावाचा नारा दिला होता. पण नंतर त्यांनी परप्रांतियांच्या कानशिलात मारली. पक्षाचा झेंडा बदलला. मला तर त्यांचा झेंडा अजूनही दिसला नाही. त्यानंतर मनसेने पुन्हा मराठीचा मुद्दा आणला. आज ते म्हणतायत की ‘गर्व से कहो हम हिंदू है’. जे स्वतः स्थिर नाहीत त्यांनी शिवसेनेला शिकवू नये. आमचे बापजादे फार पूर्वी ते म्हणत होते. आता हिंदुत्वाची भाषा करणारे ही शिवसेनेचीच पिलावळ आहे. शिवसेना ही आधीपासूनच हिंदुत्वाबरोबर आहे, होती आणि राहणार. बाळासाहेबांचे हिंदुत्व हिसकावण्याचा प्रयत्न काही जण करीत आहेत, असेही ते म्हणाले.
जळगाव महापालिकेत भाजप पुन्हा बहुमतात आला आहे, तर त्यांनी महापौर बदलून दाखवावा, असे थेट आव्हानही गुलाबराव पाटील यांनी दिले. भाजपच्या नगरसेवकांनी गटनेतेपदाच्या नोंदणीसाठी दोन्ही पक्षांकडे नोंदणी केल्याचेही त्यांनी सांगितले.
