मुंबई – विधीमंडळाच्या प्रांगणात आज महाराष्ट्र विकास आघाडी सरकारचा मंत्रिमंडळ विस्तार पार पडला.अजित पवार यांनी उपमुख्यमंत्रीपदाची शपथ घेतली. तर, काँग्रेस नेते, माजी मुख्यमंत्री अशोक चव्हाण, आदित्य ठाकरे यांनी कॅबिनेट मंत्रिपदाची शपथ घेतली. भाजपने या सोहळ्यावर बहिष्कार घातला. यावेळी महाविकास आघाडीतील तिन्ही पक्षांचे प्रमुख नेते उपस्थित होते.
महाविकास आघाडीचे सरकार स्थापन झाल्यानंतर मंत्रिमंडळाचा विस्तार लांबणीवर पडला होता. नागपूर येथील विधीमंडळाच्या हिवाळी अधिवेशनाला अवघ्या सहा मंत्र्यासह सरकार सामोरे गेले. त्यावरून विरोधी पक्षांनी टीका केली होती. अनेक चर्चा झडल्यानंतर महाविकास आघाडीच्या सरकारचा मंत्रिमंडळ विस्तार पार पडला. अजित पवार यांनी पहिल्यांदा शपथ घेतली. त्यांचे नाव पुकारल्यानंतर अजित पवार समर्थकांनी जोरदार घोषणाबाजी केली.
दरम्यान, या शपथविधी सोहळ्याला राष्ट्रवादी काँग्रेसचे अध्यक्ष शरद पवार, खासदार सुप्रिया सुळे, काँग्रेसचे महाराष्ट्र प्रभारी मल्लिकार्जुन खर्गे, मुख्यमंत्री उद्धव ठाकरे यांच्या पत्नी रश्मी ठाकरे, आदी उपस्थित होते.
