कोरोनाकाळात भारताची आर्थिक स्थिती मोठ्या प्रमाणात खालावली आहे. अशा काळात ज्यांना गुंतवणूक करायचे आहेत त्यांना आता एक चांगला पर्याय आहे. जर तुम्हाला गुंतवणूक करायची असेल तर पोस्ट ऑफिसमधील छोट्या बचत योजनामध्ये गुंतवणूक करणे एक चांगला पर्याय ठरू शकतो. पोस्ट ऑफिस रिकरिंग डिपॉझिट योजना ही एक उत्तम योजना आहे. या योजनांमध्ये अगदी कमी खर्चात गुंतवणूक करता येते, त्या तुलनेत परतावा अतिशय चांगला मिळतो.
पोस्ट ऑफिस आरडी डिपॉझिट अकाउंट ही एक सरकारी खात्रीशीर योजना आहे. या योजनेत तुम्ही अगदी कमी पैशात गुंतवणूक करू शकता. याशिवाय तुमचे पैसेही पूर्णपणे सुरक्षित असतात. यात तुम्ही दरमहा 100 रुपयांपासून गुंतवणूक करू शकता. तर गुंतवणूकीला कमाल मर्यादा नाही. ही योजना 5 वर्षांसाठी असते. दर तिमाहीत जमा झालेल्या पैशांवर चक्रवाढ पद्धतीनं व्याज जमा होते. पोस्ट खात्याच्या वेबसाइटवर देण्यात आलेल्या माहितीनुसार सध्या या योजनेवर 5.8 टक्के दरानं व्याज देण्यात येत आहे.
केंद्र सरकार आपल्या सर्व अल्पबचत योजनांसाठी दर तिमाहीला व्याज दर जाहीर करते. त्यामुळं या योजनेचे व्याजदरही दर तिमाहीला बदलतात. या योजनेत तुम्ही दहा वर्षांसाठी दरमहा 10 हजार रुपये गुंतवले तर तुम्हाला 16 लाख 26 हजार 476 रुपये मिळतील. या योजनेत आपण हप्ता वेळेवर जमा न केल्यास आपल्याला दंड भरावा लागेल. हप्ता भरायला उशीर झाल्यास दरमहा एक टक्का दंड भरावा लागेल. तसंच सलग 4 हप्ते जमा न केल्यास खातं बंद होईल. खातं बंद झाल्यास, 2 महिन्यांनी पुन्हा सुरू केलं जाऊ शकते.
