श्रीनगर – जम्मू आणि काश्मीरमधील पुलवामा जिल्ह्यात आज (शुक्रवार) सकाळी झालेल्या सुरक्षा दलाचे जवान आणि दहशतवाद्यांमधील चकमकीत 2 दहशतवादी ठार करण्यात सुरक्षा दलाला यश आले आहे.
अवंतीपोरा भागात ठार करण्यात आलेले हे दहशतवादी नेमके कोणत्या दहशतवादी संघटनेचे आहेत याबाबत अद्याप काही कळू शकले नाही. या दहशतवाद्यांकडून मोठ्या प्रमाणावर हत्यारे आणि दारूगोळा हस्तगत करण्यात आला आहे.
या कारवाईबाबत पोलिसांनी दिलेल्या माहितीनुसार, गुप्तचर यंत्रणांना मिळालेल्या माहितीवरून सुरक्षा दलाने दक्षिण काश्मीरमधील अवंतीपोराच्या ब्रोबुंदुना भागाला सर्व बाजूंनी घेरले आणि शोधमोहीम हाती घेतली. ही शोधमोहीम सुरू असतानाच दहशतवाद्यांनी जवानांवर गोळीबार सुरू केला.
दहशतवाद्यांच्या हल्ल्याला उत्तर देताना दोन दहशतवाद्यांना ठार करण्यात सुरक्षा दलाच्या जवानांना यश आले. या कारवाईदरम्यान सुरक्षा दलाचे कोणत्याही प्रकारचे नुकसान झाल्याचे वृत्त नाही.
बुधवारी सीआरपीएफच्या गस्ती पथकावर दहशतवाद्यांनी केलेल्या हल्ल्यात 5 जवान शहीद झाले होते. यां पैकी दोन जखमी जवानांचा हॉस्पिटलमध्ये उपचारादरम्यान मृत्यू झाला. या हल्ल्यात काश्मीर पोलिसातील एक पोलीस निरीक्षकही जखमी आहे.
