पाचोरा, (प्रतिनिधी) – तालुक्यातील तारखेडा येथील युवक ,चाळीसगाव आगारातील बस चालक व पाचोरा पोलीस या त्रिमूर्तीच्या सजगतेमुळे व मानवतेमुळे वृद्धा सह त्यांचे जवळ असलेली पाच लाखांची रोकड व पंचवीस तोळे सोन्याचे दागिने त्यांच्या मुलीकडे सोपविण्यात आले. या कामगिरीचे कौतुक होत आहे .
मध्य रेल्वेच्या सेवेतून निवृत्त झालेले मुरलीधर सोनवणे (वय 80) हे सध्या पिंप्राळा (ता जळगाव )येथील दांडेकर नगरात एकटेच वास्तव्यास आहेत .त्यांच्या पत्नीचे निधन झाले असून त्यांना दोन मुले व दोन मुली आहेत .दोन्ही मुले मुंबई भागात नोकरीस आहेत तर मुलीही त्यांच्या संसारात रमल्या आहेत. टाकळी प्र चा. (ता चाळीसगाव) येथील मंदाकिनी चव्हाण ही त्यांची मुलगी शिक्षिका असून तिच्याकडे मुरलीधर सोनवणे यांचे नेहमी जाणे येणे व बराच काळ वास्तव्य असते. गेल्या काही दिवसांपासून ते आपल्या मुलीकडे टाकळी याठिकाणी होते. सोमवार ता 22 रोजी सकाळी मी मंदिरात दर्शनासाठी जाऊन येतो असे सांगून ते निघाले मंदाकिनी चव्हाणही शाळेत निघून गेल्या. प्रवासी वाहतूक बंद असल्याने मुरलीधर सोनवणे हे एका ट्रकने पाचोरा पर्यंत आले. राष्ट्रीय महामार्गावर असलेल्या रेल्वे पुलाजवळच्या तारखेडा फाट्यावर ते ट्रक मधून उतरले. प्रवासाचा थकवा आल्याने रस्त्याच्या कडेला आपल्या सोबत असलेली पिशवी डोक्याखाली घेऊन ते लेटले .त्यांना झोप लागली. यावेळी तारखेडा (ता पाचोरा) येथील तुषार मोराणकर हा युवक आपल्या वडिलांसह दुचाकीने तारखेडा येथे जात असताना रस्त्याच्या कडेला पडलेल्या सोनवणें जवळ थांबला त्याने त्यांना बोलते करण्याचा प्रयत्न केला ,विचारपूस केली परंतु ते बोलत नसल्याने तुषारने त्यांच्या डोक्याखाली असलेल्या पिशवीला हात लावून त्यात ओळख पटण्या इतपत कागदपत्र आहेत की नाही या विचाराने पिशवीला हात लावला असता सोनवणे भानावर आले. त्यावरून पिशवीत किमती वस्तू असाव्यात असे तुषार मोराणकर यांच्या मनात आले. त्यांनी या वृद्धाबाबत पोलिसांना कळवले. सहाय्यक फौजदार रामदास चौधरी, पोलीस हवालदार दीपक सुरवाडे, दामोदर सोनार हे बबलू मराठे याच्या रुग्णवाहिकेसह तात्काळ घटनास्थळी पोहोचले .त्यांनी सदर वृद्धास पाचोरा पोलीस ठाण्यात आणून त्यांची ग्रामीण रुग्णालयात तपासणी केली त्यांची विचारपूस केली असता त्याची कहाणी ऐकून पोलिसही चक्रावले.
या वृद्धांच्या पिशवीत 5 लाख रुपयांची रोकड व मयत झालेल्या पत्नीचे 25 तोळे सोन्याचे दागिने होते. दोन्ही मुले मुंबईला राहतात त्यांना माझ्या आयुष्याची ही जमापुंजी व त्यांच्या मृत आईचे दागिने वाटप करायचे आहेत असे रडत रडत त्यांनी पोलिसांना सांगितले. तेव्हा पोलीसही भावनिक झाले. आम्ही तुम्हाला ओळखत नाहीत असे मुलं म्हणतात मग त्यांच्या घरी जायचे कसे असेही या वृद्धाने स्पष्ट केले.त्यांच्या बोलण्यावरून चाळीसगाव चा उल्लेख झाल्याने पोलीस हवालदार राहुल सोनवणे यांनी चाळीसगाव बस आगारात चालक असलेले सुनील मराठे यांच्याशी संपर्क साधून वृद्धा संदर्भात माहिती दिली सुदैवाने सदर बस चालक या वृद्धास ओळखत असल्याने त्यांनी पोलिसांना मंदाकिनी चव्हाण यांचा मोबाईल क्रमांक दिला त्या मोबाईल क्रमांकावर संपर्क साधून त्यांना पाचोरा येथे बोलावण्यात आले. वृद्धाची मुलगी पाचोरा पोलीस ठाण्यात आल्यावर तिला आपल्या पित्यास पाहून रडू आले. पोलीस निरीक्षक अनिल शिंदे ,उपनिरीक्षक दत्तात्रय नलावडे, गणेश चोभे ,विकास पाटील यांनी त्या वृध्दा जवळ असलेली पाच लाखांची रोकड व पंचवीस तोळे सोन्याचे दागिने त्यांच्या मुलीकडे सोपवले व त्यांना टाकळी कडे मार्गस्थ केले .
तारखेडा येथील तुषारने रस्त्यावर पडलेल्या या वृध्दाची चौकशी केली नसती व पोलिसांना कळवले नसते तर कदाचित त्यांच्या जवळचा लाखो रुपयांचा ऐवज हा कुणीतरी पळवला असता अथवा एखादी अघटित घटना ही घडली असती. परंतु तुषार , बस चालक मराठे व पोलिसांची सजगता आणि मानवता यामुळे लाखो रुपयांच्या ऐवजा सह वृद्ध पित्याला मुलीच्या ताब्यात देण्यास पोलीस यशस्वी झाले.
