नवी दिल्ली – निर्भया सामूहिक बलात्कार प्रकरणातील सर्व चार दोषींच्या फाशीची तारीख अखेर ठरली. १ फेब्रुवारी रोजी पहाटे सहा वाजता या चारही दोषींना फाशी दिली जाणार आहे. यासंदर्भातले नवे डेथ वॉरंट दिल्ली हायकोर्टाने जारी केले आहे. या चौघांपैकी एक दोषी मुकेश सिंह याने दयेचा अर्ज केल्याने आधी ठरलेली २२ जानेवारी ही फाशीची तारीख पुढे गेली होती. शुक्रवारी राष्ट्रपतींनी त्याचा दयेजा अर्ज फेटाळल्याने चौघांना फाशीवर चढवण्याचा मार्ग मोकळा झाला.
या प्रकरणीतील दोषींना २२ जानेवारीला फाशी देता येणार नाही असे पतियाळा हाऊस कोर्टाने निर्भया सामूहिक बलात्कार प्रकरणात म्हटले होते. दोषी मुकेश सिंह याचा दयेचा अर्ज प्रलंबित असल्याने फाशी देता येणार नसल्याचे कोर्टाने स्पष्ट केले होते. दयेचा अर्ज प्रलंबित असल्यानंतर डेथ वॉरंटवर आपोआप स्थगिती येते. त्यामुळे शुक्रवारी तिहार तुरुंग प्रशासनाला स्टेटस रिपोर्ट देण्याचे आदेश कोर्टाने दिले होते.
