पाचोरा । तालुक्यातील कुऱ्हाड खु॥ येथील दिनेश तुकाराम चौधरी (वय १६) या शाळकरी विद्यार्थ्याचा विहीरीत बुडून मृत्यू झाल्याची घटना आज उघडकीला आली. एकुलता एक मुलाचा मृतदेह पाहताच आई वडिलांनी हंबरडा फोडला. या घटनेने गावात शोककळा पसरली आहे.
कुऱ्हाड खु॥ येथील तुकाराम महारु चौधरी यांना दोन मुली व एक मुलगा आहे. मुलगा दिनेश हा दहावीच्या वर्षाला होता. दरम्यान, मुलगा दिनेश हा दुपारी २ वाजेपासून निदर्शनास न आल्याने गावातील त्याचे मित्र मंडळी व आई वडिलांनी शोध घेतला. गावा जवळील अनेक विहरी व पाझर तलावात शोध घेतल्यानंतर तुकाराम चौधरी यांच्या मालकीच्या शेतातील कुऱ्हाड बु” शिवारात विहीरीवर जाऊन पाहिले असता तो नजरेस न पडल्याने उपस्थितांमधील एकाने इलेक्ट्रिक मोटारीला बांधलेला दोर वर ओढून बघितला त्यावेळी चि. दिनेश हा इलेक्ट्रिक मोटार व दोरीच्या मध्ये मृत अवस्थेत अडकलेला आढळून आला.
एन पोळ्याच्या दिवशी अतिशय वाईट घटना घडल्याने व एकुलता एक मुलाचा दुर्दैवी मृत्यू झाल्याने दोन्ही गावात शोककळा पसरून गावकऱ्यांनी पोळा न साजरा करण्याचा निर्णय घेतला. दोन मुलींच्या पाठीवर झालेला एकुलता एक मुलगा वारल्याने आई वडिलांनी मोठा आक्रोश केला होता. दिनेश याच्यावर रात्री ९ वाजता अंत्यसंस्कार करण्यात येणार आहे. तो येथील आदर्श माध्यमिक विद्यालयाचा विद्यार्थी होता.
