नवी दिल्ली- दिल्ली पोलिसांनी दहशतवादी हल्ल्याचा मोठा कट उधळून लावला असून आसाममधील गोलपोरा येथून तीन संशयित दहशतवाद्यांना अटक करण्यात आली आहे. प्रथम आसाममध्ये एका जत्रेत चाचणीदाखल स्फोट घडवून आणायचा आणि नंतर दिल्लीत त्याचप्रकारे स्फोट घडवून आणायचा, असा या तिघांचा कट होता, अशी माहिती पोलीस उपायुक्त प्रमोद कुशवाह यांनी दिली. दिल्ली पोलिसांच्या विशेष पथकाने ही कारवाई केली. दरम्यान, या तिन्ही आरोपींचे ‘आयसिस’ या दहशतवादी संघटनेशी ‘कनेक्शन’ असण्याची शक्यता व्यक्त करण्यात येत आहे.
मुकद्दीर इस्लाम, रंजीत अली आणि जमाल अशी अटक करण्यात आलेल्या तीन आरोपींची नावे आहेत. जमाल हा बारावी उत्तीर्ण झालेला आहे, इस्लाम हा वाहनचालक असून मासे विक्रीचा व्यवसाय करतो तर रंजीत अली हा मासे विक्रेत्याकडे मॅनेजर म्हणून काम करतो, अशी माहिती कुशवाह यांनी दिली. तिघेही २५ ते ३० वर्षे वयाचे आहेत, असेही त्यांनी नमूद केले.
तिघांनाही आसाममधून अटक करण्यात आली असून शस्त्रास्त्र तसेच स्फोटक पावडर त्यांच्याकडून हस्तगत करण्यात आली आहे. आयईडी बनवण्यासाठी वापरण्यात येणारी ही पावडर या तिघांकडून कोणत्या माध्यमातून आली याचा तपास पोलीस करत आहेत. आरोपींचा आयसिस या दहशतवादी संघटनेशी संबध असण्याची शक्यता वर्तवण्यात आली आहे. आरोपींकडून जी स्फोटकं बनवण्यात आली आहेत ती स्फोटकं आयसिसच्या व्हिडिओचा आधार घेऊन बनवण्यात आली आहेत, असे प्रथमदर्शनी दिसत आहे. या तिघांनी मिळूनच हा कट रचला असावा. प्रथम आसाममध्येच चाचणी म्हणून एका जत्रेत स्फोट घडवून आणायचा. त्यानंतर दिल्लीत गर्दीच्या ठिकाणी स्फोट घडवून आणायचा, असा या तिघांचा कट होता, असेही पोलिसांच्या तपासातून उघड झाले.
अटक करण्यात आलेल्या तीन आरोपींचं पाकिस्तानशी काही कनेक्शन आहे का, अशी विचारणा केली असता त्याबाबत तपास सुरू आहे. आताच तसं काही सांगता येणार नाही, असे उपायुक्तांनी नमूद केले.
