…तर सहमतीने ठेवलेले संबंध बलात्कार ठरत नाहीत ; उच्च न्यायालयाचा मोठा निर्णय !

लग्नाचं वचन देऊन सहमतीने ठेवलेले शारीरिक संबंध हे वचन पूर्ण न केल्यास बलात्कार ठरत नसल्याचा मोठा निर्णय ओडिशा उच्च न्यायालयाने दिला आहे. यामुळे भुवनेश्वरमधील एका तरुणावर असलेले बलात्काराचे आरोप रद्द करण्याचे निर्देश कोर्टाने दिले आहेत.

लग्नाचं वचन हे एका विश्वासाने दिलं जातं. वचन देऊन काही कारणास्तव ते पूर्ण करू न शकणं; आणि सुरुवातीपासूनच लग्नाचं खोटं वचन देणं या दोन्ही वेगवेगळ्या गोष्टी आहेत. जर सुरुवातीपासूनच लग्नाचं खोटं वचन दिलं असेल, तर त्याप्रकरणी बलात्काराचा गुन्हा दाखल केला जाऊ शकतो. मात्र, या प्रकरणात असं झालेलं नाही”; असं न्यायमूर्तींनी निर्णय देतेवेळी नमूद केले आहे.

यावेळी ओडिशा हायकोर्टाने सर्वोच्च न्यायालयाच्या एका निर्णयाचा दाखला दिला. सर्वोच्च न्यायालयाने आपल्या एका निकालात असं म्हटलं होतं, की जर एखाद्या व्यक्तीने लग्नाचं वचन देऊन महिलेसोबत शारीरिक संबंध प्रस्थापित केले; आणि पुढे जाऊन हे लग्न होऊ शकलं नाही तर त्याला बलात्कार म्हणता येत नाही.

“एखादं नातं, जे चांगल्या आणि प्रामाणिक मैत्रीतून सुरू झालं होतं; ते पुढे जाऊन बिघडलं तर त्याला नेहमीच फसवणूक म्हणता येत नाही. अशा प्रकरणात कधीही पुरुषावर बलात्काराचा आरोप करू नये”, असंही हायकोर्टाने या प्रकरणाबाबत म्हटलं.न्यायमूर्ती आर. के. पटनायक यांनी याबाबत निर्णय दिला. दरम्यान, बलात्काराचा आरोप रद्द केला असला; तरी तरुणावरील फसवणूकीच्या आरोपाबाबत चौकशी सुरू राहणार आहे.