मुंबई- मनसे अध्यक्ष राज ठाकरे यांची गुप्त भेट घेऊन केलेल्या चर्चेनंतर विरोधी पक्षनेते देवेंद्र फडणवीस यांनी मनसेसोबत युतीचे संकेत दिले आहेत. सध्या तरी मनसे आणि भाजपची युती नाही. दोघांच्या विचारात अंतर आहे. मनसेची कार्यपद्धती बदलली आणि दोन्ही पक्षांची मनं जुळली तर युती होऊ शकते, असं देवेंद्र फडणवीस यांनी स्पष्ट केलं. त्यामुळे मनसे आणि भाजप एकत्र येण्याची शक्यता वर्तवण्यात येत आहे.
दोन दिवसांपूर्वीच मनसे नेते बाळा नांदगावकर यांनी एका वृत्तवाहिनीला मुलाखत देताना आमच्यासमोर सर्व पर्याय खुले असल्याचं सांगितलं होतं. पालघर जिल्हा परिषद निवडणुकीत तर भाजपच्या बॅनर्सवर राज ठाकरे यांचे फोटोही झळकले होते. नाशिक महापौरपदाच्या निवडणुकीत मनसे आणि भाजपने युती केली होती. मनसे आणि भाजची एकत्र येण्याची प्रक्रिया सुरू असतानाच देवेंद्र फडणवीस यांनी राज यांची प्रभादेवी येथील एका हॉटेलमध्ये गुप्त भेट घेतली होती. यावेळी राज आणि फडणवीस यांच्यासोबत सुरक्षा रक्षक आणि त्यांचे सहकारीही नव्हते. त्यामुळे हे दोन्ही पक्ष एकत्र येणार असल्याची चर्चा सुरू झाली होती. या पार्श्वभूमीवर फडणवीस यांनी हे संकेत दिले.
