मुंबई : भाजप नेते किरीट सोमय्या हे शिवसेनेचे मंत्री अनिल परब यांच्या दापोलीतील अनधिकृत रिसॉर्ट तोडण्यासाठी आज शनिवारी सकाळीच मुंबईहून दापोलीत्या दिशेने निघाले आहेत. या दरम्यान त्यांचा ताफा कशेडी घाटात अडवण्यात आला होता. यावेळी पोलिसांनी जमावबंदीचे कारण देत किरीट सोमय्या यांचा ताफा रोखण्याचा प्रयत्न केला. दरम्यान, सोमय्या यांनी मुख्यमंत्री उद्धव ठाकरेंना आव्हान केलं आहे. हिम्मत असेल तर परबांचा बंगला वाचवून दाखवावा असं किरीट सोमय्या यांनी इशारा दिला.
दापोलीतल्या एक रिसॉर्टवरून किरीट सोमय्या आक्रमक झाले आहेत. हे रिसॉर्ट बेकायदेशीर आहे आणि शिवसेना नेते अनिल परबांच्या मालकिचे आहे, असा आरोप किरीट सोमय्या सतत करत आहेत. त्यात रिसॉर्टची पाहणी करण्यासाठी सोमय्या कोकणात गेले आहेत. मात्र आधी सोमय्यांना राष्ट्रवादीचे नेते संजय कदम यांनी कडकडीत इशारा दिला होता. किरीट सोमय्यांनी येऊनच दाखवावं, हे कोकण आहे, गुजरात नाही, आम्ही त्यांना अडवणार आहे. किरीट सोमय्यांच्या येण्याने पर्यटनावर परिणाम होईल असा आरोप राष्ट्रवादीने केला आहे.
