जळगाव, (प्रतिनिधी) – येथील डॉ. उल्हास पाटील कोव्हीड केअर सेंटरमध्ये भरती होणार्या कोरोना बाधित रूग्णांवर उपचारासोबत त्यांची प्रतिकार शक्ती आणि श्वसनक्रिया सुरळीत राहण्यासाठी फिजीओथेरेपीची उपचार पध्दती फायदेशीर ठरत आहे. दरम्यान फिजीओथेरेपी महाविद्यालयाचे प्राचार्य डॉ. जयवंत नागुलकर यांनी डॉ. उल्हास पाटील कोव्हीड केअर सेंटरमध्ये सहा फिजीओथेरेपी तज्ञ डॉक्टरांची नियुक्ती केली आहे.
श्वसन क्रियेत येणार्या अडथळ्यामुळे आणि न्युमोनियाच्या त्रासामुळे कोरोनाचा संसर्ग वाढत आहे. कोरोना बाधित रूग्णांची संख्या देखिल झपाट्याने वाढत आहे. डॉ. उल्हास पाटील कोव्हीड केअर सेंटरमध्ये शासनाच्या मार्गदर्शक सुचनानुसार रूग्णांवर योग्य उपचार सुरू आहेत. यासोबतच रूग्णांची प्रतिकार शक्ती वाढावी आणि रूग्णांची श्वसन प्रक्रिया सुरळीत रहावी यासाठी योगाभ्यासासह फिजीओथेरेपीच्या उपचार पध्दतीचा अवलंब केला जात आहे. यासाठी डॉ. उल्हास पाटील कोव्हीड केअर सेंटरमध्ये सहा तज्ञ फिजीओथेरेपी डॉक्टरांची नियुक्ती करण्यात आली आहे असे डॉ नागुलकर यांनी सांगीतले.
या तज्ञ डॉक्टरांची नियुक्ती
फिजीओथेरेपीसाठी डॉ. प्रज्ञा महाजन, डॉ. अजिज अली सैय्यद, डॉ. श्रृती चौधरी, डॉ. निखिल पाटील, डॉ. विष्णू रानडे, डॉ. अनुराग मेहता या तज्ञ डॉक्टरांची नियुक्ती करण्यात आली आहे. या सहाही तज्ञ डॉक्टरांकडून कोरोना बाधित रूग्णांवर फिजीओथेरेपीच्या उपचार पध्दतीने श्वसन प्रक्रिया सुरळीत करण्याविषयीचे व्यायाम केले जात आहे. रूग्णांची श्वसननलिका खुली ठेवणे, त्यातील बेडके, स्त्राव बाहेर काढणे, ऑक्सीजनचे प्रमाण वाढविणे हे फिजीओथेरेपीस्टच्या कामाचे मुख्य स्वरूप आहे. फिजीओथेरेपीमुळे व्हेंटीलेटर असणार्या रूग्णांचा कालावधी कमी करण्यात मदत होते. तसेच रक्तातील ऑक्सीजनचे प्रमाण वाढविण्यासाठीही फिजीओथेरेपीची मदत होत आहे. या उपचार पध्दतीत उजव्या किंवा डाव्या कुशीवर तर कधी पोटावर झोपण्यास सांगितल्यावर अनेक वेळा रूग्णांची प्राणवायु पातळी सुधारण्यास मदत होते. फुफ्फुसाचेही व्यायाम रूग्णांकडुन करून घेतले जात आहे. कोरोना बाधित रूग्णांसाठी फिजीओथेरेपी खुप फायदेशीर ठरत आहे.
