जामनेर- जामनेर तालुक्यातील चार महसुली गावांचा व दप्तरांचा ताळमेळ लागत नाही. या गावांचे महसूल दप्तरी दफे आहेत, मात्र प्रत्यक्षात गाव जागेवर नसल्याचा हा धक्कादायक प्रकार उघडकीस आला आहे.
जामनेर तालुक्यात १५९ महसुली गावे असून सन २०११ च्या जनगणनेनुसार संबंधीत गावांना शासनाचा कोड नंबर आला आहे. याबाबतची यादी तहसील कार्यालयास प्राप्त झाली आहे. त्यात शेंदुर्णी मंडळात बोरगाव, नवापूर, तर जामनेर मंडळात रामपूर, रामपूर तांडा व रामपुरा अशी तीन गावे दिसून येत आहेत. वरील पाच गावांमध्येच हा घोळ असण्याची शक्यता आहे. संबंधीत गावांचे दप्तरी दफे देखील अस्तित्वात आहेत. मात्र, यापैकी चार गावे अस्तित्वात नाहीत. दीड वर्षांपूर्वी जामनेर तालुक्यात १५३ कि १५५ महसुली गावे आहेत, असा पेच निर्माण झाला होता. त्यामुळे जिल्हाधिकाऱ्यांनी हा घोळ मिटवा अशा सूचना तत्कालिन तहसीलदार नामेदव टिळेकर यांना दिल्या होत्या. त्यांनी दप्तर पळताळणी करून १५५ महसुली गावांची अंतीम यादी तयार करून शासनाला सादर केली होती. असे असले तरी तहसील कार्यालयास शासनाकडून १५५ नव्हे, तर चक्क १५९ महसुली गावे व त्यांच्या कोड नंबरची यादी प्राप्त झाली. त्यामुळे दीड वर्षात ही चार गावे कशी व कुठे वाढली? याबाबत खल सुरू आहे. कारण प्रत्यक्षात एवढी गावेच अस्तित्वात नाहीत.
गावांचा ताळमेळ बसवू
शासनाकडून १५९ महसुली गावांची ऑनलाइन यादी प्राप्त झाली आहे. सन २०११ च्या जनगणनेच्या आधारावर ही यादी करण्यात आली. मात्र, यापूर्वी १५५ गावे असल्याचा अहवाल पाठवला होता. असे असताना काही ओस गावांच्या समावेशाने १५९ गावांची यादी प्रसिद्ध झाली असावी. तालुक्यातील सर्व तलाठ्यांकडून माहिती घेऊन ताळमेळ बसवू.
मच्छिंद्र पाडळे, निवासी नायब तहसीलदार, जामनेर
