जळगाव : जिल्ह्यात 151 ग्राम पंचायतीसाठी रविवारी मतदान पार पडले होते. आज सोमवारी मतमोजणी करण्यात आली. हाती आलेल्या निकालानुसार, मुक्ताईनगर तालुक्यातील 4 पैकी 3 जागांवर शिंदे गटाचा झेंडा फडकला आहे. जामनेर तालुक्यातील 17 ग्रामपंचायतीपैकी 12 ग्रामपंचायतीवर भाजपाने बाजी मारली आहे. तर जळगाव ग्रामीण मतदारसंघात गुलाबराव पाटलांनी गड राखत 32 पैकी 28 जागांवर बाजी मारली आहे.
जळगाव ग्रामीण मतदारसंघात 32 पैकी 28 जागांवर शिंदे गटाने विजय मिळवला आहे. तर पाळधी या पालकमंत्री गुलाबराव पाटील यांच्या मूळगावी वर्चस्व कायम दिसून आले. विजय रूपसिंग पाटील पाळधी या गावी गुलाबराव पाटील यांचे समर्थक सरपंचपदी विराजमान झाले. यावल तालुक्यात शिवसेना शिंदे गटाचे वर्चस्व असल्याचे स्पष्ट झाले आहे. 11 पैकी 5 जागा जिंकल्या आहेत. भाजपा 3, राष्ट्रवादी शरद पवार गट, काँग्रेस, अपक्ष प्रत्येकी एक विजयी उमेदवार विजयी झाले आहे. तर अमळनेर तालुक्यात मदत व पुनर्वसन मंत्री अनिल पाटील यांचे वर्चस्व कायम असल्याचे पाहायला मिळाले. अमळनेर तालुक्यातील 17 पैकी 14 ग्रामपंचायतवर अजित पवार गटाचा झेंडा फडकला असून दोन ग्रामपंचायतीवर भाजपने विजय मिळवला आहे तर शरद पवार गटाला मात्र एका ग्रामपंचायतीवर समाधान मानावे लागले आहे. मुक्ताईनगर तालुक्यातील चार पैकी तीन ग्रामपंचायतीवर शिंदे गटाने बाजी मारली असून राष्ट्रवादी शरद पवार गटाला एका जागेवर समाधान मानावे लागले आहे. जामनेर तालुक्यातील 17 ग्रामपंचायती पैकी 12 ग्रामपंचायतीवर भाजपचा झेंडा फडकला आहे.
या निवडणुकीच्या निमित्ताने मंत्री गुलाबराव पाटील, मंत्री गिरीश महाजन,मंत्री अनिल पाटील आणि माजी मंत्री एकनाथ खडसे यांच्या प्रतिष्ठा पणाला लागल्या होत्या.
