जळगाव प्रतिनिधी : भाजपाची सत्ता असलेल्या जळगाव महापालिकेत शिवसेनेने महापौर व उपमहापौर पदाच्या निवडणुकीपासून शिवसेनेने करेक्ट कार्यक्रम राबवित भाजपचे नगरसेवक आपल्याकडे खेचणे अद्याप सुरु ठेवले आहे. आधीच ३० नगरसेवक शिवसेनेच्या गळाशी गेले असता आता आणखी ७ नगरसेवक सेनेत प्रवेश करणार असल्याचे बोलल जात आहे. यामुळे विरोधी पक्षनेते देवेंद्र फडणवीस यांच्या दौर्याआधीच भाजपला जोरदार धक्का बसणार असल्याचे स्पष्ट झाले आहे.
शिवसेनेने मार्च महिन्यात भाजपचे २७ नगरसेवक फोडल्यानंतर दोन दिवसापूर्वी ३ नगरसेवक फोडून गळाशी लावले होते. आता पुन्हा आणखी ७ नगरसेवक शिवसेनेच्या वाटेवर असल्याच्या चर्चेने राजकीय वातावरणात खळबळ उडाली आहे.
दरम्यान, भाजपला लागलेल्या गळतीच्या पार्श्वभूमिवर, माजी मंत्री आ. गिरीश महाजन यांनी काल रात्री तातडीने बैठक घेऊन नगरसेवकांनी राजकीय आत्महत्या करू नये असा इशारावजा सल्ला दिला. या बैठकीला भाजपचे २४ नगरसेवक उपस्थित असल्याची माहिती देखील सूत्रांनी दिली. तथापि, आज भाजपमधील काही नगरसेवक मुंबईत दाखल झाले असून त्यांचा शिवसेनेत प्रवेश होणार असल्याची माहिती समोर आली आहे.
