जळगाव प्रतिनिधी । जळगाव शहरात घरफोडीचे सत्र सुरूच आहे. दरम्यान, घरी कोणी नसल्याचा फायदा घेत अज्ञात चोरट्यांनी अडीच लाखांचा ऐवज लंपास केल्याची घटना आज गुरुवारी सकाळी शहरातील योगेश्वर नगरात उघडकीस आली. याप्रकरणी शनीपेठ पोलिसात गुन्हा दाखल करण्यात आला आहे.
याबाबत असे कि, शहरातील जुने जळगावात असलेल्या योगेश्वर नगर परिसरात प्लॉट क्रमांक ५ मध्ये विकास चंद्रकांत भोळे हे पत्नी काजल व दोन मुलांसह राहतात. विकास भोळे हे उपचारासाठी पुणे येथे तर काजल भोळे या आपल्या वडिलांच्या सुश्रुषेसाठी प्रेमचंद नगरात गेले असल्याची संधी चोरट्यांनी साधली.
गुरुवारी सकाळी मुलगा धवल हा सायकलने घरी आला असता त्याला घराचा दरवाजा उघडा दिसला. चोरट्यांनी भोळे यांच्या घराचे कुलूप तोडून घरातील कपाटातील ७५ हजार रुपये रोख व सोने-चांदीचे दागिने असा २ लाख ४४ हजार १०० रुपयांचा ऐवज चोरट्यांनी लंपास केला. याप्रकरणी शनीपेठ पोलिसात गुन्हा दाखल करण्यात आला असून तपास सहाय्यक पोलीस निरीक्षक यशोदा कानसे या करीत आहेत.
