पारोळा । जळगाव जिल्हा पुन्हा एका घटनेने हादरला आहे. भडगाव तालुक्यातील गोंडगाव येथील घटनेला काही दिवस होत नाही, तोवर पारोळा तालुक्यातील धुळपिंप्री येथे एका चौदा वर्षीय मुलीवर अत्याचार करून जिवे मारण्याचा प्रयत्न झाल्याची घटना समोर आलीय. मात्र, रक्तबंबाळ अवस्थेत पीडितेने नराधमाच्या तावडीतून सुटका करून घेत जीव वाचवला. या घटनेनंतर संतप्त झालेल्या ग्रामस्थांनी पारोळा येथे पोलिस ठाण्यात येऊन महामार्गावर रास्ता रोको केला. त्यानंतर पोलिसांनी बारक्या ऊर्फ अशोक मंग्या भिल (२२) याला अटक केली.
पीडित मुलगी सायंकाळी गावाबाहेर असलेल्या नदीपात्राजवळ शौचासाठी गेली होती. यावेळी बारक्याने तिला ठार मारण्याची धमकी देत अत्याचार केला. तसेच अत्याचारास विरोध केला असता नराधमाने मुलीच्या डोक्यावर दगडाने वार करून व दोरीने गळा आवळून जीवे मारण्याचा प्रयत्न केला.
मुलीने कशीबशी त्याच्या तावडीतून सुटका करत रक्तबंबाळ अवस्थेत घराकडे धाव घेत घडलेला प्रकार आपल्या कुटंुबाला सांगितला. हा प्रकार तिचा भाऊ व आईने ग्रामस्थांना सांगितला. प्रथम उपचार करा, असा सल्ला ग्रामस्थांनी दिल्यानंतर रात्री पारोळा कुटीर रुग्णालयात प्राथमिक उपचार करून तिला धुळे येथे हलवण्यात आले आहे. पीडित मुलीच्या भावाने दिलेल्या फिर्यादीवरून संशयित आरोपी अशोक मंग्या भिल याच्याविरुद्ध पोक्सोअंतर्गत गुन्हा दाखल करण्यात आला आहे.
