जळगाव । जळगाव जिल्हा न्यायालयाने शिवसेनेचे (शिंदे गट) मंत्री गुलाबराव पाटील यांना दणका दिला आहे. राष्ट्रवादीचे नेते एकनाथ खडसे यांनी केलेल्या अब्रुनुकसानीच्या खटल्यात गैरहजर राहिल्याने कोर्टाने गुलाबराव पाटील यांना ५०० रुपयांचा दंड ठोठावला आहे.
काय आहे प्रकरण?
२०१४ च्या युती सरकारमध्ये एकनाथ खडसे यांच्याकडे १२ खाती होती. त्यावेळी गुलाबराव पाटील यांनी त्यांच्यावर मंत्रिपदाचा गैरवापर केल्याचा आरोप करत सरकारकडून लाखो रुपयांचे अनुदान लाटण्याचा आरोप केला होता. यामुळे खडसे यांनी पाटील यांच्याविरोधात २०१६ साली जळगाव जिल्हा सत्र न्यायालयात पाच कोटी रुपयांच्या अब्रु नुकसानीचा दावा दाखल केला होता. या खटल्याची नव्याने सुनावणी झाली आहे.
खडसे यांनी पाटील यांच्यावर केलेल्या अब्रु नुकसानीचा दावा दाखल केल्याची सुनावणी जळगाव जिल्हा सत्र न्यायालयात सुरु होती. या सुनावणीच्या पहिल्याच दिवशी मंत्री गुलाबराव पाटील हे गैरहजर होते. गुलाबराव पाटील यांनी आपल्या वकिलामार्फत सुनावणीला गैरहजर राहण्याची परवानगी मिळण्याची अर्ज दाखल केला होता. यावेळी कोर्टाने ५०० रुपयांचा दंड ठोठावत गुलाबरावांचा अर्ज मंजूर केला. अर्ज मंजूर करताना उद्याच्या सुनावणीचा दिवस सोडून पुढची तारीख मिळणार नाही, अशी तंबी दिली, माजी मंत्री एकनाथ खडसे यांचे वकील भूषण देव यांनी दिली आहे. या बहुचर्चित खटल्याची पुढची सुनावणी २१ जून रोजी ठेवली आहे.
