मुंबई : शिवसेना मंत्री गुलाबराव पाटील यांनी बोदवड नगरपंचायत निवडणुकीसाठी आयोजित प्रचार सभेत भाषण करताना आपल्या मतदारसंघातील रस्ते हेमा मालिनींच्या गालासारखे केल्याचं म्हटलं आहे. गुलाबराव पाटील यांनी केलेल्या वक्तव्यामुळे आता नवा वाद उभा राहिला आहे. विरोधी पक्षनेते प्रवीण दरेकर यांनी गुलाबरावांवर गुन्हा दाखल करण्याची मागणी केलीय. तर भाजपच्या प्रदेश उपाध्यक्षा चित्रा वाघ यांनी गुलाबराव पाटील यांच्यावर टीका करत कारवाईचा इशारा दिलाय.
“शिवसनेनेच्या नेत्यांना झालंय काय? राऊतानंतर आत्ता गुलाबराव पाटील त्यांनी हेमा मालिनीबद्दल बेताल वक्तव्य केलं.गुलाबराव पाटील-रांझ्याचा पाटील वृत्ती तीच आहे. महाराजांनी त्याची पाटीलकी काढून घेतली. हे सरकार गुलाबरावाची मंत्रीपदावरून हकालपट्टी काढणार आहे का?”
शिवीगाळ करणारे संजय राऊत उजळ माथ्यानं फिरताहेत. गुलाबराव पाटलांना हेमा मालिनीचे गाल दिसताहेत. पण पोलीस यंत्रणांना यांत महिलांचा विनयभंग दिसत नाही. मी गृहमंत्र्यांना आवाहन करतेय, तात्काळ गुन्हा दाखल करा.. नाहीतर गाल पाहणाऱ्यांचे थोबाड फोडल्याशिवाय आम्ही स्वस्थ बसणार नाही. असंही चित्रा वाघ यांनी म्हटलं आहे.
नेमकं काय म्हणाले गुलाबराव पाटील?
“माझं चॅलेंज आहे 30 वर्षे आमदार राहिलेल्याला… या माझ्या धरणगावला, जर हेमा मालिनीच्या गालासारखे रस्ते नतर राजीनामा देईल.” बोदवड येथील प्रचारसबेत भाषण करताना गुलाबराव पाटील यांनी हे विधान केलं आहे. त्यांनी पुढे म्हटलं, “अरे महाराष्ट्राला ज्ञान काय शिकवताय, पहिले बोदवडचा रस्ता करा.” असं म्हणत गुलाबराव पाटील यांनी एकनाथ खडसेंना आव्हान दिलं आहे.
