जळगाव प्रतिनिधी : बीएचआर पतसंस्था गैरव्यवहार प्रकरणी मुख्य सूत्रधार सुनील झंवर याला अटक झाल्यानंतर माजी मंत्री आ. गिरीश महाजन यांच्याकडे बोट दाखवले जात असताना महाजन यांनी अनेक दावे केले. बीएचआर प्रकरणी अटक झालेला मुख्य सूत्रधार सुनील झंवर हा माझाच नव्हे तर सर्वच राजकीय पक्षांचा निकटवर्तीय असल्याचा गौप्यस्फोट गिरीश महाजन यांनी पत्रकारांशी बोलताना केला.
बीएचआर पतसंस्थेतील गैरव्यवहारप्रकरणी गेल्या नऊ महिन्यांपासून पोलिसांना हुलकावणी देणाऱ्या मुख्य संशयित सुनील झंवरला पुणे आर्थिक गुन्हे शाखेच्या पथकाने नाशिक येथे अटक केली. सुनील झंवर हा गिरीश महाजन यांचा निकटवर्तीय मानला जात असल्याने तसेच त्यांच्या कार्यालयातील झडतीमध्ये महाजन यांच्या शस्त्र परवान्याच्या झेरॉक्स मिळाल्याने अनेक प्रश्न उपस्थित झाले होते. जळगाव येथे जिल्हाधिकारी कार्यालयात आलेल्या गिरीश महाजन यांना याबाबत पत्रकारांनी विचारणा केली असता, त्यांनी सुनील झंवर सर्वांच्या निकट असल्याचे सांगितले.
महाजन यांनी सांगितले की, बीएचआर पतसंस्था प्रकरणात कायद्यानुसार जे असेल ते होईल. अनेक लोकांना यात अटक झालेली आहे. यामध्ये पोलीस यंत्रणा त्यांची चौकशी करते आहे. यामधून जे निष्पन्न व्हायचे आहे ते होइल. सुनील झंवर माझेच नाही तर सर्वांचेच निकटवर्तीय आहेत, कुणाचे नाहीयेत? असा प्रश्न उपस्थित करीत सर्वच पक्षांशी त्यांचे संबध आहेत. माझ्या इतकेच सर्वांशी त्यांचे संबध आहेत. कुणी नाही म्हणून दाखवावे, असे आव्हानही त्यांनी दिले. बीएचआर प्रकरणी कायद्याप्रमाणे कारवाई झाली आहे. आता त्यातून काय ते निष्पन्न होईल, असेही महाजन यांनी शेवटी सांगितले.
