जुन्नर : पुण्याच्या जुन्नरमध्ये एक अत्यंत दुर्दैवी घटना समोर आलीय. गर्भवती पत्नीचा डोळ्यादेखत अपघाती मृत्यूनंतर पतीने आत्महत्या केल्याची दुर्दैवी घटना घडली आहे. रमेश कानसकर असं 29 वर्षीय पतीचं तर विद्या कानसकर असं पत्नीचं नाव होतं.
काही दिवसापूर्वी रमेश हा गर्भवती पत्नी विद्या आणि सासू असे तिघे खरेदीसाठी बाहेर पडले होते. नारायणगाव येथील सोनाराच्या दुकानातील खरेदी उरकून हे तिघे घरी परतत होते. तेव्हा एक मोठा गतिरोधक लागला. पत्नी गर्भवती असल्याने ती दुचाकीवरुन खाली उतरली. मात्र त्याचवेळी ऊसाने भरलेल्या ट्रॅक्टरच्या ट्रॉलीची धडक विद्याला लागली आणि त्याच ट्रॉलीचं चाक तिच्या शरीरावरुन गेल्याने तिचा दुर्दैवी मृत्यू झाला.
डोळ्यादेखत घडलेला अपघात आणि त्यात मृत्यू पावलेली पत्नी गर्भवती असल्याने रमेशला मोठा धक्का बसला होता. हे सगळं माझ्यामुळेच झालं, माझ्या पत्नीच्या मृत्युला मीच जबाबदार आहे. या विचारात तो स्वतःला त्रास करुन घेत होता. यातूनच रमेश रात्री त्याने विषारी औषध प्राशन केलं. पहाटेच्या सुमारास त्याची तब्येत खालावली. कुटुंबीयांनी रुग्णालयात दाखल केलं. मात्र डॉक्टरांनी त्याला मृत घोषित केलं.
पत्नीच्या मृत्यूनंतर दुर्दैवाने त्याचाही मृत्यू झाल्यामुळे कानसकर कुटुंबियांमध्ये दु:खाचा डोंगर पसरला आहे. या घटनेमुळे जुन्नरमध्ये खळबळ उडाली आहे. दोघांच्याही अचानक जाण्याने सगळीकडे हळहळ व्यक्त केली जात आहे.
