जळगाव : हुडकोच्या थकीत कर्जासाठी डीआरटी कोर्टाच्या आदेशाने महापालिकेची सर्व बँक खाती गोठविण्याची प्रक्रिया काल बुधवारपासून सुरु करण्यात आली आहे. मनपाच्या ३ बँकांमधील ४० च्यावर खात्यांची माहिती डीआरटीने मागविली आहे. कारवाई टाळण्यासाठी पालिकेने हायकोर्टात धाव घेतली आहे. यापूर्वीच दाखल केलेल्या पुनर्विलोकन याचिकेवर २ जुलै रोजी सुनावणी होणार असून त्यात दिलासा मिळविण्यासाठी प्रशासनाकडून प्रयत्न सुरु आहेत..
घरकुलसह विविध योजनांसाठी मनपाने १४१ कोटी ३४ लाखांचे मनपाकडून कर्ज घेतले होते. या कर्जाची रिसेटींग केल्यानतंरदेखील कर्जाचे हप्ते थकल्यामुळे हुडकोने डीआरटीत धाव घेतली होती. याप्रकरणी डीआरटीने ३४१ कोटीची डिक्री नोटीस मनपाला बजावली. तसेच सप्टेंबर २०१४ मध्ये तब्बल ५० दिवस मनपाची सर्व बँक खाती सील केली होती. डीआरटीच्या डिक्री नोटीसला स्थगिती मिळावी, म्हणून मनपाने मुंबई उच्च न्यायालयात याचिका दाखल केली. यानंतर एकरकमी परतफेडीची प्रक्रिया सुरु असतांनाच काल बुधवारी सायंकाळी डीआरटीतील हुडकोच्या विधीतज्ज्ञांचे पत्र मनपा प्रशासनाला मिळाले आहे. त्यांनी महापालिकेच्या ३ बँकांमधील सर्व खात्यांची माहिती मागवून खाते गोठविण्याची प्रक्रिया सुरु केली आहे.
खाते सील करण्याची प्रक्रिया सुरू होताच महापालिकेचे प्रशासन हादरले आहे. काल सांयकाळपासून हायकोर्ट व डीआरटीतील महापालिकेची बाजू मांडणाऱ्या वकिलांशी आयुक्त व लेखा परीक्षकांनी चर्चा सुरु केली आहे. महापालिकेने यापूर्वीच हुडको कर्जाबाबत हायकोर्टात याचिका दाखल केली आहे. काल झालेल्या खाते सील कारवाईच्या पार्श्वभूमीवर महापालिकेच्या वकिलांनी ही परिस्थिती हायकोर्टाच्या निदर्शनास आणून दिली आहे. यावर आता २ जुलै रोजी सुनावणी होणार आहे. या सुनावणीच्याप्रसंगी महापालिका आपली बाजू मांडून खाते सील कारवाईतून दिलासा मिळविण्यासाठी प्रयत्नशील आहे.
————–
