जळगाव : जिल्हा कारागृहात कैदी असलेल्या महिलेने पंख्याला गळफास घेवून आत्महत्येचा प्रयत्न केल्याचा धक्कादायक प्रकार सकाळी समोर आला आहे. या घटनेमुळे मोठी खळबळ उडाली आहे. अनिता राजा चावरे (वय ५०) असे या महिलेचे नाव आहे. दरम्यान,या महिलेविरोधात जिल्हापेठ पोलीस स्थानकात गुन्हा दाखल करण्यात आला आहे.
अल्पवयीन मुलीला पळवून तिच्यासोबत बनावट कागदपत्रांच्या आधारे लग्न केले तसेच तिच्यावर अत्याचार केल्याप्रकरणी शनिपेठ पोलीस ठाण्यात दाखल गुन्हयात अनिता चावरे या न्यायालयीन कोठडीत आहेत.
आज सकाळी अनिता चावरे या कैदी महिलेने कारागृहातील बॅरेक क्रमांक २ मध्ये साडीचा पदरचा काठ कापून बॅरेकमधील पंख्याला गळफास घेण्याचा प्रयत्न केला. वेळीच प्रकार लक्षात आल्याने दुर्घटना टळली. याप्रकरणी जिल्हा कारागृहातील महिला रक्षक उषा मुरलीधर भोम्बे यांच्या फिर्यादीवरुन जिल्हापेठ पोलीस ठाण्यात आत्महत्येचा प्रयत्न केल्याप्रकरणी अनिता चावरे यांच्या विरोधात गुन्हा दाखल झाला आहे. दरम्यान आत्महत्येचा प्रयत्न का केला त्याचे कारण कळू शकलेले नाही. घटनेने एकच खळबळ उडाली आहे. पुढील तपास सहाय्यक फौजदार पुरूषोत्तम वागळे हे करीत आहेत.
