जळगाव : माझे बापजादे श्रीमंत होते, पण यांचे वडील शिक्षक होते, मग त्यांच्याकडे १०००-१२०० कोटींची संपत्ती कशी आली? असा सवाल करत राष्ट्रवादी काँग्रेसचे नेते एकनाथराव खडसे यांनी माजी मंत्री आमदार गिरीश महाजन यांचं नाव न घेता लक्ष्य केले होते. दरम्यान, यावरून आता गिरीश महाजन यांनी टोला लगावला.
खडसे यांचे आता मानसिक संतुलन बिघडले आहे. म्हणून ते कुणावरही काहीही बेछूट आरोप करीत आहेत असे प्रत्युत्तर देत आज आमदार गिरीश महाजन यांनी नाथाभाऊंनी त्यांचे सत्ताधारी पक्षातील वजन वापरून माझ्या सगळ्या मालमत्तांची चौकशी करावी असे आव्हान दिले. जामनेर येथे गिरीश महाजन यांनी जामनेर पत्रकार परिषदेचे आयोजन केले होते. त्यावेळी ते बोलत होते.
आम्ही निवडणुकीवेळी चार चार महीने मतदार संघाच्या बाहेर असुनही ४० हजार मतांनी निवडून आलो. मात्र खुद्द एकनाथराव खडसे व त्यांचे सर्व सहकारी निवडणुकीवेळी मुक्ताईनगर मध्ये उपस्थित असूनही त्यांना निवडणूक जिंकता आली नाही. ज्याप्रकारे खडसे यांनी मुक्ताईनगर विधानसभेतील विकास केला आहे त्यामुळे त्यांचा पराभव झाला, असेही महाजन म्हणाले.
