जळगाव । शासन आपल्या दारी अभियानातंर्गत जळगाव जिल्हास्तरीय कार्यक्रमासाठी राज्याचे मुख्यमंत्री एकनाथ शिंदे आणि उपमुख्यमंत्री देवेंद्र फडणवीस जळगावात आले आहे. यादरम्यान, देवेंद्र फडणवीस यांनी राष्ट्रवादीचे नेते एकनाथ खडसे यांच्यावर टीका केलीय. एकनाथ खडसे यांना आता नवीन मालक मिळाला आहे, त्या नवीन मालकांनी जसे सांगितले तसे एकनाथ खडसे करतात. जमीन घोटाळ्यामध्ये त्यांनी तोंड काळ केले होते. त्यांनी तोंड काळ केले नसते तर त्यांना काळे झेंडे दाखवण्याची वेळ आली नसती, अशी खरमरीत टीका उपमुख्यमंत्री देवेंद्र फडणवीस यांनी एकनाथ खडसे यांच्यावर केली आहे.
अशा काळ्या झेंड्यांना घाबरणारे आम्ही नाही. एकनाथ खडसेंनी तोंड काळे केले नसते तर त्यांना नवीन मालकाकडे जावे लागले नसते. त्यांना आपल्या परिवारात राहता आले असते. आम्ही जनतेची लोक आहोत. जनतेसाठी काम करत आहोत, जनतेला फायदा देण्यासाठी आम्ही येथे आलो आहोत. आणि जळगावची जनता आमच्या सोबत आहे, असा दावा देखील देवेंद्र फडणवीस यांनी केला.
शासन आपल्या दारी प्रत्येक जिल्ह्यामध्ये होत आहे. लाखो लोक त्या ठिकाणी येत आहेत. तुम्ही लाखो लोकांना मूर्ख बनवू शकत नाही. असे मत फडणवीस यांनी व्यक्त केले. कार्यक्रमाला येण्यासाठी दबाव टाकण्यात येत असल्याचा आरोप करण्यात आला होता. त्याला त्यांनी प्रत्युत्तर दिले आहे. नागरिकांची काम होत आहेत, सर्वांना कनेक्टिव्हिटी मिळत आहे, मागील सरकार हे दरवाजात बंद होते, ते फेसबुक लाईव्ह करत होते, आम्ही जनतेत लाईव्ह आहोत. आम्ही लोकांची कामे करत आहोत, त्यामुळे काही लोकांची मळमळ होते, ती बाहेर निघते आणि अशा प्रकारचे आरोप होत असल्याचे देवेंद्र फडणवीस म्हणाले.
