जळगाव,(प्रतिनिधी)- स्थानिक गुन्हे अन्वेषण शाखेचे पोलीस निरीक्षक किरणकुमार बकाले यांनी पोलीस अंमलदार अशोक महाजन यांच्याशी फोनवर बोलत असताना मराठा समाजाविषयी आक्षेपार्ह भाषा वापरली होती. दोघांमधील संवादाची कॉल रेकॉर्डिंग व्हायरल झाल्यानंतर याप्रकरणी विशेष पोलीस महानिरीक्षक बी. जी. शेखर यांनी त्यास निलंबित करण्यासह खातीनिहाय चौकशीचे आदेश दिले होते. दरम्यान, गुरुवारी बकाले यांच्याविरुद्ध विनोद देशमुख यांनी फिर्याद दिली असून जिल्हापेठ पोलिसात गुन्हा दाखल करण्यात आला आहे.
दरम्यान, बकाले यांचे ज्या पोलिस कर्मचार्याशी हा संवाद घडला त्या कर्मचार्यासही जळगाव जिल्हा पोलिस अधीक्षक डॉ.प्रवीण मुंढे यांनी निलंबित केल्याने पोलिस वर्तुळात प्रचंड खळबळ उडाली आहे. सहाय्यक फौजदार अशोक महाजन असे निलंबित झालेल्या पोलीस कर्मचार्याचे नाव असून ते गुन्हे शाखेत हजेरी मास्तर म्हणून कर्तव्यास होते.
स्थानिक गुन्हे अन्वेषण शाखेचे पोलीस निरीक्षक किरणकुमार बकाले यांनी पोलीस अंमलदार अशोक महाजन यांच्याशी फोनवर बोलत असताना मराठा समाजाविषयी आक्षेपार्ह भाषा वापरली होती. दोघांमधील संवादाची कॉल रेकॉर्डिंग व्हायरल झाल्यानंतर लोकप्रतिनिधी आक्रमक झाले होते.
आज गुरुवारी जळगाव शहरातील बांधकाम व्यावसायिक तथा राष्ट्रवादी काँग्रेसचे पदाधिकारी विनोद देशमुख यांनी जिल्हापेठ पोलीस ठाण्यात किरणकुमार बकाले यांच्याविरुद्ध फिर्याद दिली आहे. निरीक्षक बकाल आणि एलसीबीचे हजेरी मेजर अशोक महाजन यांना मी ओळखतो. दि.१४ रोजी माझ्या मोबाईलवर एक ऑडिओ क्लीप आली. मी क्लिप ऐकली असता निरीक्षक बकाले हे सहाय्यक फौजदार अशोक महाजन यांच्याशी फोनवर बोलत असताना त्यांनी मराठा समाजाबद्दल आक्षेपार्ह वक्तव्य केले आहे.
स्त्रियांना लज्जास्पद वाटेल आणि समाजात जातीय तेढ निर्माण करणारे वक्तव्य बकाले यांनी केले आहे. मी मराठा समाजाचा असून अशा वक्तव्यामुळे सार्वजनिक शांतता धोक्यात येण्याची शक्यता आहे. विनोद पंजाबराब देशमुख रा.मधुबन, महाराष्ट्र बँक कॉलनी, महाबळ, जळगाव यांच्या फिर्यादीवरून किरणकुमार भगवानराव बकाले यांच्याविरुद्ध जिल्हापेठ पोलीस ठाण्यात भादंवि कलम १५३-अ, १५३-ब, १६६, २९४, ५००,५०९ या कलमानुसार गुन्हा दाखल करण्यात आला आहे. पुढील तपास अरुण धार हे करीत आहेत.
